இரண்டாவது சீசனை வரவேற்கும் விதமாக, கொடைக்கானல் மலைப்பகுதியில் பூத்துக்குலுங்கும் ட்ரீ டெய்லியா மலர்கள்.
பழநி: கொடைக்கானலில் 2-வது சீசனை வரவேற்கும் விதமாக பூத்துக்குலுங்கும் ட்ரீ டெய்லியா, செர்ரி பூக்கள் சுற்றுலாப் பயணிகளை வெகுவாக கவர்ந்து வருகின்றன.
‘மலைகளின் இளவரசி’ என்று அழைக்கப்படும் கொடைக்கானலில் கடந்த ஏப்ரல் முதல் ஜூன் மாதம் வரையிலான கோடைகால சீசன் நடந்து முடிந்துள்ளது. நேற்று முன்தினம் (நவ.1) முதல் 2-வது சீசன் தொடங்கி உள்ளது. தொடர் மழை காரணமாக கொடைக்கானல் முழுவதும் பசுமை போர்த்தியது போல் ரம்மியமாக காட்சியளிக்கிறது.
இந்தாண்டு முன் கூட்டியே பனிக்காலம் தொடங்கி உள்ளது. இரவு முதல் அதிகாலை வரை கடுங்குளிர் நிலவி வருகிறது. கொடைக்கானலில் குளிரைத் தாங்கும் ஆயத்த ஆடைகள் விற்பனையும் களை கட்டியுள்ளது. கொடைக்கானல் மலைப்பகுதியில் அரிய வகை பூச்செடிகள், தாவரங்கள், மரங்கள் உள்ளன.
அந்த வகையில், 2-வது சீசனை வரவேற்கும் விதமாக செர்ரி மரங்கள் பூக்கத் தொடங்கி உள்ளன. இதேபோல், ட்ரீ டெய்லியா, பைன் செட்டியா ஆகிய மலர்களும் பூத்துக்குலுங்கி சுற்றுலாப் பயணிகளை வெகுவாக கவர்ந்து வருகின்றன.இரண்டாவது சீசனை வரவேற்கும் விதமாக, கொடைக்கானல் மலைப்பகுதியில் பூத்துக்குலுங்கும் ட்ரீ டெய்லியா மலர்கள்.
