எம்.கே.தியாகராஜ பாகவதர் பேரனுக்கு ரூ.5 லட்சம் நிதி : குறைந்த வாடகைக் குடியிருப்பும் ஒதுக்கி முதல்வர் உத்தரவு

பழம்பெரும் நடிகர் எம்.கே.தியாகராஜ பாகவதரின் பேரனுக்கு அரசு சார்பில் குறைந்த வாடகைக் குடியிருப்பும் மற்றும் ரூ.5 லட்சம் நிதியுதவியும் வழங்க முதல்வர் மு.க.ஸ்டாலின் அறிவித்தார்.

இதுகுறித்து முதல்வர் நேற்று வெளியிட்ட அறிக்கையில் கூறிஇருப்பதாவது:

எம்.கே.டி. என்று அன்போடு அழைக்கப்பட்ட எம்.கே.தியாகராஜ பாகவதர், தமிழ்த் திரைப்பட உலகின் முதல் நட்சத்திர அந்தஸ்து பெற்ற உயர் நட்சத்திர கதாநாயகனும், மிகச் சிறந்த கர்னாடக சங்கீத பாடகருமாகத் திகழ்ந்தவர். அவர் நடித்த பல திரைப்படங்கள் வெற்றிப் படங்களாக தமிழகத்தில் அன்றைய காலகட்டத்தில் உலா வந்தன. குறிப்பாக, 1944-ம் ஆண்டு வெளியான ‘ஹரிதாஸ்’ எனும் திரைப்படத்தில் கதாநாயகனாக நடித்த இவர், தமிழ்த் திரையுலகின் முதல் சூப்பர் ஸ்டாராகக் கருதப்பட்டார்.

வறிய நிலையில்...

தமிழ்த் திரையுலகில் மிகப்பிரபலமாக அக்காலகட்டத்தில் விளங்கிய எம்.கே.தியாகராஜ பாகவதரின் மகள் வழிப்பேரன் சாய்ராம் மற்றும் அவரது குடும்பத்தினர், தற்போது மிகவும் வறியநிலையில், குடியிருக்க வீடின்றி, மிகவும் சிரமமான சூழ்நிலையில் வசித்து வருவதை அறிந்த முதல்வர் மு.க.ஸ்டாலின், சாய்ராம் குடும்பத்தினருக்கு அரசு சார்பில் குறைந்த வாடகையில் தமிழ்நாடுவீட்டு வசதி வாரியக் குடியிருப்பில் பொது ஒதுக்கீட்டின்கீழ் வீடு ஒன்றினை ஒதுக்கித் தரவும், முதல்வரின் பொது நிவாரண நிதியில் இருந்து ரூ.5 லட்சம் நிதியுதவியும் வழங்க முதல்வர் உத்தரவிட்டுள்ளார்.

கருத்தைப் பதிவு செய்ய