வில்லிபுத்தூர் கோயிலில் இருந்து - ரங்கம் நம்பெருமாளுக்கு : வஸ்திர மரியாதை வழங்கல் :

ரங்கம் ரங்கநாதர் கோயிலில் உற்சவரான நம்பெருமாளுக்கு வில்லிபுத்தூர் ஆண்டாள் கோயிலில் இருந்து நேற்று வஸ்திர மரியாதை வழங்கப்பட்டது.

ரங்கம் ரங்கநாதர் கோயிலில் சித்திரை தேர் திருவிழா நடைபெற்று வருகிறது. ஆண்டுதோறும் நடைபெறும் இவ்விழாவின் 9-ம் திருநாளன்று உற்சவரான நம்பெருமாளுக்கு வில்லிபுத்தூர் ஆண்டாள் கோயிலில் இருந்து வஸ்திர மரியாதை அளிக்கப்படும்.

அந்த வகையில், வில்லிப்புத்தூர் ஆண்டாள் கோயிலில் இருந்து ஆண்டாள் கிளி மாலை, பட்டு வஸ்திரங்கள் மற்றும் மங்கலப் பொருட்கள் ஆகியவற்றை ஆண்டாள் கோயில் செயல் அலுவலர் இளங்கோவன், தக்கார் ரவிச்சந்திரன், ரமேஷ் பட்டர் ஆகியோர் ரங்கம் கோயிலுக்கு நேற்று எடுத்து வந்து கோயில் இணை ஆணையர் செ.மாரிமுத்துவிடம் வழங்கினர்.

இந்த வஸ்திரங்கள் மற்றும் கிளி மாலை ஆகியவை ரங்கம் கோயிலில் நடந்து வரும் சித்திரை தேர் திருவிழாவின் 9-ம் திருநாளான இன்று (மே 9) சித்திரை தேரோட்டத்துக்கு பதிலாக கருட வாகனத்தில் எழுந்தருளும் நம்பெருமாளுக்கு அணிவிக்கப்படும்.