சிறுவர்களை கொத்தடிமை போல நடத்தி ஆடு மேய்க்க வைத்தவர் கைது :

தஞ்சாவூர்: தஞ்சாவூர் மாவட்டம் வல்லம்புதூர் பகுதியைச் சேர்ந்த தம்பதிக்கு 14 வயதுக்குட்பட்ட 4 மகன்கள் உள்ளனர். ராமநாதபுரம் மாவட்டத்தைச் சேர்ந்த கோவிந்தராஜ்(49) ஆடு மேய்க்கும் பணிக்கு 4 பேரையும் அழைத்து செல்வதாகவும், அதற்கு கூலியாக ஆண்டுதோறும் பணம் கொடுப்பதாகவும் தம்பதியிடம் தெரிவித்து, 4 பேரையும் அழைத்துச் சென்றுள்ளார்.

சிறுவர்கள் 4 பேரையும் சூரக்கோட்டை பரிசுத்தம் நகர் பகுதியில் ஆடு மேய்க்கும் தொழிலில் ஈடுபடுத்திய கோவிந்தராஜ் அவர்களை கொத்தடிமைகள் போல நடத்தியுள்ளார். இதுகுறித்து சைல்டு லைன் அமைப்புக்கு புகார் வந்தது. இதையடுத்து, கொத்தடிமைகள் போல நடத்தப்பட்ட 4 சிறுவர்களும் கோட்டாட்சியர் ரஞ்சித் எடுத்த நடவடிக்கை மூலம் டிச.7-ம் தேதி மீட்கப்பட்டனர்.

இதுகுறித்து சூரக்கோட்டை கிராம நிர்வாக அலுவலர் சங்கீதா தஞ்சாவூர் தாலுகா காவல் நிலையத்தில் புகார் செய்தார். அதன்பேரில், இன்ஸ்பெக்டர் ஜெகதீஸ்வரன் வழக்குப் பதிவு செய்து சிறுவர்களை கொத்தடிமைகள் போல நடத்திய கோவிந்தராஜை நேற்று கைது செய்தார்.