திருப்பூர் மாவட்டத்தில் - உள்ளாட்சி பதவிகளுக்கு 140 மையங்களில் இடைத்தேர்தல் : ஆர்வத்துடன் வாக்களித்த பொதுமக்கள்

திருப்பூர் மாவட்டத்தில் காலியாக உள்ள 12 உள்ளாட்சி பதவிகளுக்கு நேற்று இடைத்தேர்தல் நடந்தது. 140 வாக்குப்பதிவு மையங்களில் காலை 7 மணிக்கு வாக்குப்பதிவு தொடங்கியது.

காங்கயம் வட்டாரத்தில் மாவட்ட ஊராட்சி வார்டு 10-க்கானஉறுப்பினர் தேர்தல் மற்றும் தாராபுரம் வட்டாரத்தில் ஊராட்சி ஒன்றியவார்டு எண் 12-க்கும் தேர்தல் நடந்தது. அதேபோல, அவிநாசிவட்டாரம் கருவலூர், மூலனூர் வட்டாரம் எரிசனம்பாளையம் மற்றும் உடுமலை வட்டாரம் ஆர்.வேலூர் ஆகிய 3 ஊராட்சிகளுக்கு தேர்தல் நடந்தது. கிராம ஊராட்சி வார்டுஉறுப்பினர்கள் 12 பேர் போட்டியின்றி தேர்வாகினர்.

உடுமலை ஒன்றியத்துக்குட் பட்ட ஆர்.வேலூர் ஊராட்சி தலைவர் பதவிக்கு தேர்தல் நடந்தது. மாவட்டம் முழுவதும், 7 வார்டு உறுப்பினர்கள் உட்பட 12 பதவியிடங்களுக்கு தேர்தல் நடந்தது. காலை 7 மணி முதல் மாலை 6 மணி வரை வாக்குப்பதிவு நடந்தது.

கருவலூரில் நேற்று காலை லேசான மழை பெய்த போதிலும் பொதுமக்கள் ஆர்வத்துடன் வாக்களித்தனர். மாவட்டம் முழுவதும் காலை 9 மணி நிலவரப்படி, 13 சதவீத வாக்குகள் பதிவாகி இருந்தன. 11 மணி நிலவரப்படி 30.71 சதவீதமும், மதியம் 1 மணிக்கு 45.41 சதவீதமும், மாலை 3 மணிக்கு 56.57 சதவீதமும் , மாலை 6 மணிக்கு 68.47 சதவீத வாக்குகளும் பதிவாகி இருந்தன.

திருப்பூர் மாவட்டத்தில் நடைபெற்ற இடைத்தேர்தலில், 70.24 சதவீத ஆண் வாக்காளர்களும், 66.8 சதவீத பெண் வாக்காளர்களும் வாக்களித்துள்ளனர்.

நீலகிரி

மசினகுடியில் ஆட்கொல்லி புலி அச்சம் நிலவும் நேரத்திலும், 4-வது வார்டுக்கான உறுப்பினரை தேர்வு செய்யும் ஆர்வத்துடன் தங்களது வாக்குகளை பொதுமக்கள் பதிவு செய்தனர். மூன்று வார்டுகளில் நேற்று இரவு 7 மணி வரை 62.79 சதவீதம் வாக்குகள் பதிவாகின. மொத்தம் 4,535 வாக்குகளில் 2,773 வாக்குகள் பதிவாகின. அதில், 1,371 ஆண்கள் வாக்காளர்களும், 1,402 பெண் வாக்காளர்களும் வாக்களித்தனர்.