பாரிசில் நடந்த நாசியல் சர்வதேச செஸ் போட்டிகளில், ஈரோட்டைச் சேர்ந்த கிராண்ட் மாஸ்டர் பி.இனியன் சாம்பியன் பட்டம் பெற்றுள்ளார்.
பிரான்ஸ் தலைநகர் பாரிசில், ‘நாசியல் சர்வதேச ஓபன் செஸ் சாம்பியன்ஷிப்’ போட்டிகள், ஆகஸ்ட் 23-ம் தேதி முதல் 28-ம் தேதி வரை நடந்தது. இதில் 9 நாடுகளைச் சேர்ந்த 54 சதுரங்க வீரர்கள் பங்கேற்றனர். இந்தியாவின் சார்பில் ஈரோட்டைச் சேர்ந்த கிராண்ட் மாஸ்டர் பி.இனியன் பங்கேற்றார்.
9 சுற்றுகளாக நடந்த கிளாசிகல் பிரிவில், ஏழு போட்டிகளில் வெற்றி பெற்றும், 2 போட்டிகளில் சமன் செய்தும், 8 புள்ளிகளுடன் இனியன் முதல் இடம் பிடித்தார். உக்ரைன் வீரர் கிராண்ட் மாஸ்டர் யூரி ஸ்லோடோவ்நிச்சன்கோ இரண்டாவது இடமும், பிரான்ஸ் வீரர் காம்ராத் யான்னிக் மூன்றாவது இடமும் பெற்றனர்.
மேலும், கடந்த 24-ம் தேதி நடந்த, ‘நாசியல் சர்வதேச ஓபன் பிலிட்ஸ் 2021 (விரைவு)’ போட்டியில், 9 சுற்றுகளில், 7 சுற்றுகளில் பி.இனியன் வெற்றி பெற்றார். ஒரு ஆட்டத்தில் தோல்வியும், ஒரு ஆட்டத்தை சமன் செய்ததன் மூலம் 7.5 புள்ளிகள் பெற்று முதலிடம் பெற்றார். கடந்த ஜனவரிக்குப் பின்னர் கிராண்ட் மாஸ்டர் பி.இனியன் இந்த போட்டியில்தான் முதன்முதலாக நேரடியாக பங்கேற்றுள்ளார் என்பது குறிப்பிடத்தக்கது.