கல்லூரிகளுக்கான தரவரிசைப் பட்டியல் -  ராமகிருஷ்ணா கலை அறிவியல் கல்லூரி சாதனை :

இந்தியா டுடே வெளியிட்ட, கல்லூரிகளுக்கான தரவரிசைப் பட்டியலில், கோவை நவஇந்தியாவில் உளள,  ராமகிருஷ்ணா கலை அறிவியல் கல்லூரி கோவை மாவட்டத்தில் முதலிடமும், தேசிய அளவில் வியத்தகு சாதனையையும் படைத்துள்ளது.

பாரதியார் பல்கலைக்கழகத்துடன் இணைவு பெற்று, தேசிய தர நிர்ணயக் குழுவின் ஏ பிளஸ் கிரேடு மற்றும் தன்னாட்சி அந்தஸ்துடன், இக்கல்லூரி செயல்பட்டு வருகிறது. இக்கல்லூரியில் 27 இளநிலைப் பட்டப்படிப்புகள், 9 முதுகலை பட்டப்படிப்புகள், எலக்ட்ரானிக்ஸ், கணினி அறிவியல் உள்ளிட்ட 10 பாடப்பிரிவுகளில் பகுதி நேரம், முழு நேர ஆராய்ச்சிப் படிப்புகள் நடத்தப்பட்டு வருகின்றன. இளநிலை, முதுநிலை, ஆராய்ச்சிப் படிப்புகளில் 5 ஆயிரத்துக்கும் மேற்பட்ட மாணவ, மாணவிகள் படிக்கின்றனர்.

இந்தியா டுடே நிறுவனம் 25-வது ஆண்டாக, இந்தியாவில் உள்ள கல்லூரிகளை சர்வே செய்து, பல்வேறு அளவுகோல்களின் அடிப்படையில், கல்லூரிகளை தரவரிசைப்படுத்தியதில் அறிவியல், பி.சி.ஏ, விடுதி மேலாண்மைப் பாடப்பிரிவுகளில் கோவை மாவட்டத்தில் உள்ள கல்லூரிகளில்,  ராமகிருஷ்ணா கலை அறிவியல் கல்லூரிக்கு முதலிடம் கிடைத்துள்ளது. அகில இந்திய அளவில் அறிவியல் பாடப்பிரிவில் 51-வது ரேங்க், பி.சி.ஏ பாடப்பிரிவில் 24-வது ரேங்க், வணிகவியல் பிரிவில் 74-வது ரேங்க், மேலாண்மை பாடப்பிரிவில் 31-வது ரேங்க், பி.பி.ஏ பாடப்பிரிவில் அகில இந்திய அளவில் 48-வது ரேங்க், கலைப் பாடப்பிரிவுகளில் 77-வது ரேங்க், சமூகப் பணியியல் பாடப்பிரிவில் 29-வது ரேங்க் பெற்று தேசிய அளவில் தனக்கான இடத்தை இக்கல்லூரி பதிவு செய்துள்ளது. இதையடுத்து இக்கல்லூரியின் முதல்வர் மற்றும் செயலர் பி.எல்.சிவக்குமார், துறைத் தலைவர்கள், பேராசிரியர்கள், மாணவர்களை கல்லூரியின் நிர்வாக அறங்காவலர் டி.லட்சுமி நாராயணசாமி பாராட்டினார்.l