தூத்துக்குடியில் அகில இந்திய பிஎஸ்என்எல் அதிகாரிகள் சங்க சிறப்பு செயற்குழு கூட்டம் நடைபெற்றது. அகில இந்திய பொதுச் செயலாளர்சிவக்குமார் தலைமை வகித்தார்.
செய்தியாளர்களிடம் அவர் கூறியதாவது: பிஎஸ்என்எல் நிறுவனத்துக்கு 4ஜி அலைக்கற்றை உடனடியாக வழங்க வேண்டும். கடந்த 55 மாதங்களாக பிஎஸ்என்எல் ஊழியர்களுக்கு மாத ஊதியம் 20-ம் தேதிக்கு பின்னரே வழங்கப்படுகிறது. எனவே மாத ஊதியத்தை மாத இறுதி நாளில், அதாவது 1-ம் தேதிக்கு முன்பே வழங்க வேண்டும். கிராமப்புற சேவை, மலைப்பகுதி சேவைக்கு வழங்க வேண்டிய பாக்கி தொகையான ரூ.30 ஆயிரம் கோடியை உடனடியாக வழங்க வேண்டும். டெல்லியில் நடைபெறும் விவசாயிகள் போராட்டத்துக்கு பிஎஸ்என்எல் அதிகாரிகள் சங்கம் முழு ஆதரவு தெரிவிக்கிறது என்றார்.