அவிநாசி அரசு கலை மற்றும் அறிவியல் கல்லூரியில் பாரதியார் பிறந்த நாள் விழா நேற்று கொண்டாடப்பட்டது.
அவிநாசி கல்லூரி முதல்வர் ஜோ.நளதம் தலைமை வகித்தார். தமிழ்த்துறை தலைவர் போ.மணிவண்ணன் வரவேற்றார். பாரதியாரின் எள்ளு பெயரன் நிரஞ்சன் பாரதி காணொலி வாயிலாக மாணவர்களிடம் பேசினார். கல்லூரி மாணவர்கள் சார்பில் பாரதி குறித்த இசை நிகழ்ச்சி, உரை நிகழ்ச்சி உள்ளிட்டவை நடைபெற்றன. நிறைவாக பாரதியார் எனும் பெயர் வடிவில் கல்லூரி மாணவிகள் நின்று மரியாதை செலுத்தினர். கவுரவ விரிவுரையாளர்கள் தே.புனிதராணி, ம.நந்தினி ஆகியோர் நிகழ்ச்சியை ஒருங்கிணைத்தனர். மாணவர் ச.சந்தோஷ் நன்றி தெரிவித்தார்.
இதேபோல அவிநாசி பெண்கள் மேல்நிலைப் பள்ளியில் உள்ள பாரதியார் உருவச்சிலைக்கு, பள்ளி மாணவர்கள், பல்வேறு சமூக அமைப்பினர், சமூக ஆர்வலர்கள் மாலை அணிவித்து, மரியாதை செலுத்தினர். திருப்பூர் மாநகராட்சி செல்லப்புரம் நடுநிலைப்பள்ளியில் நடைபெற்ற பாரதியார் பிறந்தநாள் விழாவுக்கு சமூக ஆர்வலர் கந்தசாமி தலைமை வகித்தார். பாரதியார் பிறப்பு மற்றும் பாடல்கள் குறித்து பள்ளி தலைமையாசிரியர் வி.புவனேஸ்வரி பேசினார். உதவி தலைமை ஆசிரியர்கள் அ.சுமதி, மரியபிரகாஷ் உட்பட பலர் பங்கேற்றனர்.