பொள்ளாச்சியில் - சாலையில் கிடந்த துப்பாக்கியை : போலீஸில் ஒப்படைத்த மூதாட்டி :

பொள்ளாச்சி நகரில் சாலையில் கிடந்த நாட்டு துப்பாக்கியை காவல்நிலையத்தில் ஒப்படைத்த மூதாட்டியிடம் போலீஸார் விசாரணை நடத்தி வருகின்றனர்.

கோவை மாவட்டம், அன்னூர் ஒட்டர்பாளையம் பகுதியைச் சேர்ந்தவர் விஜயலட்சுமி (72). பொள்ளாச்சியில் வசிக்கும் பேத்தியின் வீட்டுக்கு வந்த விஜயலட்சுமி, கோவை சாலையில் உள்ள உணவகத்துக்கு நேற்று நடந்து சென்றுள்ளார். அப்போது சாலையோரம் கருப்புநிற ‘ரெயின் கோட்’ கிடந்துள்ளது. அதை எடுத்துப் பார்த்தபோது, அதில் இரண்டு கையுறைகள் மற்றும் ஒரு நாட்டு கைத்துப்பாக்கி சுற்றி வைக்கப்பட்டு இருந்தது.

இதுபற்றி அவரது பேரன் விஜய் (23)-யிடம் தகவல் தெரிவித்தார். விஜய்யின் அறிவுறுத்தலின் பேரில் கைத்துப்பாக்கியை பொள்ளாச்சி கிழக்கு காவல் நிலையத்தில் ஒப்படைத்தார்.

பொள்ளாச்சி மகாலிங்கபுரம் காவல்நிலைய எல்லைக்குள் துப்பாக்கி கிடைத்ததால், மகாலிங்கபுரம் போலீஸார் விசாரணை நடத்தி வருகின்றனர்.

விஜயலட்சுமி மற்றும் விஜய்யிடம் டிஎஸ்பி தமிழ்மணி விசாரணை நடத்தினார்.