நெருங்கும் நகர்ப்புற உள்ளாட்சித் தேர்தல் - கோவை மாநகரை மையப்படுத்தி திட்டங்களை அறிவித்த முதல்வர்: திமுகவினர் உற்சாகம் :

நகர்ப்புற உள்ளாட்சித் தேர்தல் நெருங்கும் சூழலில், கோவை மாநகராட்சியை மையப்படுத்தி புதிய திட்டங்கள் குறித்து முதல்வர் அறிவித்தது, திமுகவினரிடையே உற்சாகத்தை ஏற்படுத்தியுள்ளது.

தமிழகத்தில் தற்போது ஊரகப் பகுதிகளுக்கு உள்ளாட்சித் தேர்தல் நடந்துமுடிந்துள்ளது. இதைத் தொடர்ந்து மாநகராட்சி, நகராட்சி, பேரூராட்சி உள்ளிட்ட நகர்ப்புற பகுதிகளுக்கான தேர்தல் தேதி விரைவில் அறிவிக்கப்பட உள்ளது. தமிழகத்தில் திமுக ஆளும் கட்சியாக இருந்தாலும், கோவை மாவட்டத்தில் உள்ள 10 சட்டப்பேரவைத் தொகுதியிலும், எதிர்க்கட்சியைச் சேர்ந்தவர்களே எம்.எல்.ஏக்களாக உள்ளனர்.

இதே நிலை தொடர்வதை தடுக்கவும், கோவையில் திமுகவை வாக்குவங்கி ரீதியாக பலப்படுத்தவும், நடைபெறவுள்ள நகர்ப்புற உள்ளாட்சித் தேர்தலில் வெற்றி வாய்ப்பை அதிகரிக்கவும், நேற்று நடைபெற்ற விழாவில் கோவை மாநகரை மையப்படுத்தி புதிய திட்டங்களை முதல்வர் அறிவிப்பார் என திமுகவினர் எதிர்பார்த்தனர். அதன்படியே, புதிய திட்டங்களை ஸ்டாலின் அறிவித்தார்.

இதுதொடர்பாக, அரசியல் நோக்கர்கள் கூறும்போது, ‘‘கோவை விமானநிலைய விரிவாக்கத்துக்கு ரூ.1,132 கோடி ஒதுக்கியது, மாநகரில் 2 நாட்களுக்கு ஒருமுறை குடிநீர் விநியோகம், ரூ.200 கோடி மதிப்பில் 5 திட்ட சாலைகள், சாலை மேம்பாட்டுப் பணிகள் மேற்கொள்ளுதல், மாநகராட்சியின் இணைப்புப் பகுதியான சரவணம்பட்டி, சின்னவேடம்பட்டி, வெள்ளக்கிணறு ஆகிய பகுதிகளில் ரூ.309 கோடி மதிப்பில் பாதாள சாக்கடை திட்டம் செயல்படுத்துதல், இடநெருக்கடியை தவிர்க்க சிறைச்சாலையை நகருக்கு வெளியே மாற்றுதல், ரூ.200 கோடி மதிப்பில் செம்மொழிப் பூங்கா அமைத்தல், மாநகரில் திடக்கழிவு மேலாண்மைப் பணிக்காக ரூ.11 கோடி கூடுதலாக ஒதுக்கீடு, கோவை மக்களின் மருத்துவ வசதிக்காக ரூ.16 கோடி மதிப்பில் மருத்துவ மையங்கள், 3 மருத்துவ ஆய்வுக்கூடங்கள் அமைக்கப்படும் என பல்வேறு அறிவிப்புகளை முதல்வர் வெளியிட்டுள்ளார்.

இதுதொடர்பான அரசாணைகளும் விரைவில் வெளியிடப்பட்டு பணிகள் முடிக்கப்படும் என முதல்வர் அறிவித்துள்ளார். இது மக்களிடம் வரவேற்பை பெற்றுள்ளது மட்டுமின்றி, திமுகவினரிடையே உற்சாகத்தை ஏற்படுத்தியுள்ளது. நகர்ப்புற உள்ளாட்சித் தேர்தல் நெருங்கும் சூழலில், மக்களிடம் இந்த அறிவிப்புகள் தாக்கத்தை ஏற்படுத்தும். திமுகவுக்கு பலம் சேர்க்கும்’’ என்றனர்.