ரங்கம் கோயிலில் உறியடி உற்சவம் :

ரங்கம் ரங்கநாதர் கோயிலில் கிருஷ்ண ஜெயந்தியையொட்டி உறியடி உற்சவம் நேற்று நடைபெற்றது.

இதையொட்டி, நேற்று காலை கிருஷ்ணர் சன்னதியிலிருந்து புறப்பட்டு, எண்ணெய் விளையாட்டு கண்டருளி மீண்டும் சன்னதிக்கு திரும்பினார். பின்னர், மாலை 3 மணிக்கு நம்பெருமாள், உபயநாச்சியார்கள், கிருஷ்ணர் ஆகியோருடன் திருச்சிவிகையில் புறப்பட்டு கருட மண்டபத்தை வந்தடைந்தார். அங்கிருந்து இரவு 9 மணிக்கு புறப்பட்டு 9.15 மணிக்கு கருட மண்டப வளாகத்திலேயே உறியடி உற்சவம் கண்டருளினார்.

இதற்கென கருட மண்டபத்தில் பூக்களால் அலங்கரிக்கப்பட்டிருந்தது. அலங்கரிக்கப்பட்ட 3 பானைகளில் பால், தயிர், வெண்ணை நிரப்பபட்டு, அதன் எதிரே நம்பெருமாள், கிருஷ்ணர் ஆகியோர் வந்தவுடன், நீண்ட குச்சியால் பானைகள் உடைக்கப்பட்டு உறியடி உற்சவம் நடைபெற்றது. இதைத் தொடர்ந்து, அங்கிருந்து கிருஷ்ணர் மற்றும் நம்பெருமாள் புறப்பட்டு இரவு 9.30 மணிக்கு மூலஸ்தானத்தை சென்றடைந்தனர்.