ஆம்பூர்: திருப்பத்தூர் மாவட்டம் ஆம்பூர் அடுத்த ஆலாங்குப்பம் பகுதியில் எருது விடும் விழா நேற்று நடைபெற்றது. திருப்பத்தூர், நாட்றாம்பள்ளி, வாணியம்பாடி, ஆலங்காயம், குடியாத்தம், பேரணாம்பட்டு, காட்பாடி உள்ளிட்ட பகுதிகளில் இருந்து 300-க்கும் மேற்பட்ட காளைகள் பங்கேற்றன.
காலை 8.30 மணிக்கு தொடங்கிய விழா நண்பகல் 1 மணியளவில் முடிவடைந்தது. குறிப்பிட்ட இலக்கை நோக்கி காளைகள் சீறிப்பாய்ந்து ஓடின.
ஆம்பூர் வருவாய்த் துறையினர் போட்டிக்கான ஏற்பாடுகளை கண்காணித்து ஆய்வு செய்தனர். ஆம்பூர் துணை காவல் கண்காணிப்பாளர் சச்சிதானந்தம் தலைமையில் 50-க்கும் மேற்பட்ட காவலர்கள் பாதுகாப்புப் பணியில் ஈடுபட்டனர். போட்டி முழுவதும் வீடியோவால் பதிவு செய்யப்பட்டது. குறைந்த நேரத்தில் இலக்கை அடைந்த எருதுகளின் உரிமையாளர்களுக்கு 40 வகையான பரிசுகள் வழங்கப்பட்டன. போட்டியை காண வந்தவர்களில் 15 பேர் மாடு முட்டியதில் படுகாயமடைந்தனர்.