கலைஞரின் வருமுன் காப்போம் திட்டத்தில் - தமிழகத்தில் 50 இடங்களில் இன்று மருத்துவ முகாம்கள் : அமைச்சர் மா.சுப்பிரமணியன் தகவல்

கலைஞரின் வருமுன் காப்போம்திட்டத்தின்படி இன்று 50 இடங்களில் மருத்துவ முகாம்கள் நடத்தப்பட உள்ளதாக சுகாதாரத் துறை அமைச்சர் மா.சுப்பிரமணியன் தெரிவித்தார்.

தமிழகத்தில் 5-வது கட்ட மெகாகரோனா தடுப்பூசி முகாம் 32 ஆயிரம் இடங்களில் நேற்று முன்தினம் நடைபெற்றது. அமைச்சர் மா.சுப்பிரமணியன் ராமநாதபுரம், திண்டுக்கல், கரூர் மாவட்டங்களில் ஆய்வு மேற்கொண்டார்.

நேற்று காலை சென்னைதிரும்பிய அவர், விமான நிலையத்தில் செய்தியாளர்களிடம் கூறியதாவது:

2006 டிசம்பர் 30-ம் தேதி கருணாநிதியால் தொடங்கப்பட்ட வருமுன்காப்போம் திட்டம் கூடுதல் மருத்துவ வசதிகளுடன் கடந்த மாதம் 29-ம் தேதி சேலத்தில் முதல்வர் ஸ்டாலினால் மீண்டும் தொடங்கி வைக்கப்பட்டு, ஆண்டுக்கு 1,250 மருத்துவ முகாம்கள் நடத்தப்படும் என அறிவிக்கப்பட்டுள்ளது.

அதன்படி, அனைத்து மாவட்டங்களிலும் 50 இடங்களில் 12-ம்தேதி (இன்று) காலை 9.30மணிக்கு தொடங்கி பிற்பகல் 4 மணிவரை மருத்துவ முகாம் நடைபெற உள்ளது. சென்னையில் 2 இடங்களில் கலைஞரின் வருமுன் காப்போம் திட்டம் நடைபெற உள்ளது.அந்த முகாம்களில் 17 அரங்குகளில் சிகிச்சைகள் வழங்கப்பட உள்ளன.

இவ்வாறு அவர் கூறினார்.

பொது சுகாதாரத் துறை இயக்குநர் செல்வ விநாயகம் உள்ளிட்ட அதிகாரிகள் உடன் இருந்தனர்.