48,786 பேருக்கு கரோனா தொற்று :

மத்திய சுகாதார அமைச்சகம் நேற்று வெளியிட்ட அறிக்கையில் கூறியிருப்பதாவது:

நாட்டில் கடந்த 24 மணி நேரத்தில் 48,786 பேருக்கு கரோனா வைரஸ் தொற்று ஏற்பட்டுள்ளது. கடந்த செவ்வாய்க்கிழமை (ஜூன் 29) புதிய நோயாளிகள் எண்ணிக்கை 37,566 ஆக இருந்தது. இது, மார்ச் 18-க்கு பிறகு மிகக் குறைந்த எண்ணிக்கை ஆகும். புதிய நோயாளிகள் எண்ணிக்கை புதன், வியாழன் ஆகிய இரு தினங்களில் சற்று கூடியுள்ளது. எனினும் 23-வது நாளாக இது 1 லட்சத்துக்கு குறைவாக உள்ளது.

நாட்டில் தற்போது 5 லட்சத்து 23,257 பேர் கரோனா தொற்றுக்கு சிகிச்சையில் உள்ளனர். கடந்த 24 மணி நேரத்தில் 1,005 பேர் உயிரிழந்தனர். இதனால் மொத்த உயிரிழப்பு 3 லட்சத்து 99,459 ஆக உயர்ந்துள்ளது.

கரோனா தொற்றுக்கு உயிரிழப்பு ஜூன் 30-ல் 817 ஆக இருந்தது. ஏப்ரல் 10-க்கு பிறகு இதுவே மிகக் குறைந்த எண்ணிக்கை ஆகும். இந்நிலையில் உயிரிழப்பு எண்ணிக்கை 3 நாட்களுக்கு பிறகு ஆயிரத்தை கடந்துள்ளது.

கரோனா மொத்த நோயாளிகள் எண்ணிக்கை 3 கோடியே 4 லட்சத்து 11,634 ஆக உயர்ந்துள்ளது. கடந்த 24 மணி நேரத்தில் 61,588 நோயாளிகள் குணமடைந்துள்ளனர். இதன் மூலம் குணமடைந்தோர் மொத்த எண்ணிக்கை 2 கோடியே 94 லட்சத்து 88,918 ஆனது.

கடந்த 24 மணி நேரத்தில் 27 லட்சத்து 60,345 பேருக்கு கரோனா தடுப்பூசி போடப்பட்டுள்ளது. இதுவரை மொத்தம் 33.57 கோடி டோஸ்கள் தடுப்பூசி செலுத்தப் பட்டுள்ளது. இவ்வாறு அந்த அறிக்கையில் கூறப்பட்டுள்ளது.