ஐசிசி உலக டெஸ்ட் சாம்பியன்ஷிப் : நியூஸி. பந்துவீச்சில் 217 ரன்களுக்கு ஆட்டமிழந்தது இந்திய அணி :

ஐசிசி உலக டெஸ்ட் சாம்பியன்ஷிப் இறுதிப் போட்டியில் நியூஸிலாந்துக்கு எதிராக முதல் இன்னிங்ஸில் 217 ரன்களுக்கு ஆட்டமிழந்தது இந்திய அணி.

சவுத்தாம்டனில் நடைபெற்று வரும் இந்த போட்டியில் முதலில் பேட் செய்த இந்திய அணி 2-வது நாள் ஆட்டத்தில் 64.4 ஓவர்களில் 3 விக்கெட்கள் இழப்புக்கு 146 ரன்கள் எடுத்தது. கேப்டன் விராட் கோலி 44, அஜிங்க்ய ரஹானே 29 ரன்களுடன் ஆட்டமிழக்காமல் இருந்தனர். நேற்று 3-வது நாள் ஆட்டத்தை தொடர்ந்த நிலையில் விராட் கோலி மேற்கொண்டு ரன் ஏதும் எடுக்காத நிலையில் ஜேமிசன் பந்தில் எல்பிடபிள்யூ ஆனார். தொடர்ந்து ரிஷப் பந்த் 4 ரன்களில் நடையை கட்டினார். ரஹானே 117 பந்துகளில், 49 ரன்கள் எடுதத நிலையில் நெய்ல் வாக்னர் பந்தில் ஆட்டமிழந்தார்.

அஸ்வின் 22 ரன்களில் டிம் சவுதி பந்தில் வெளியேறினார். இஷாந்த் சர்மா 4, ஜஸ்பிரீத் பும்ரா 0 ரன்களில் ஜேமிசன் பந்தில் நடையை கட்டினர். இறுதியாக ரவீந்திர ஜடேஜா 15 ரன்களில் டிரெண்ட் போல்ட் பந்தில் வெளியேற இந்திய அணி 92.1 ஓவர்களில் 217 ரன்களுக்கு அனைத்து விக்கெட்களையும் இழந்தது. நியூஸிலாந்து அணி சார்பில் கெய்ல் ஜேமிசன் 5 விக்கெட் வீழ்த்தினார். தொடர்ந்து பேட் செய்த நியூஸிலாந்து 29 ஓவர்களில் விக்கெட் இழப்பின்றி 57 ரன்கள் எடுத்திருந்தது. டேவன் கான்வே 31, டாம் லேதம் 25 ரன்களுடன் களத்தில் இருந்தனர்.