நாமக்கல்லில் 6 தொகுதியில் 4-ல் திமுக வெற்றி: அதிமுகவுக்கு 2 இடம் :

நாமக்கல்: நாமக்கல் மாவட்டத்தில் நாமக்கல், ராசிபுரம், சேந்தமங்கலம், திருச்செங்கோடு, குமாரபாளையம், பரமத்தி வேலூர் என 6 சட்டப்பேரவைத் தொகுதிகள் உள்ளன. இதில் திருச்செங்கோடு நீங்கலாக மற்ற 5 தொகுதிகளில் அதிமுக, திமுக நேரடியாக போட்டியிட்டன. திருச்செங்கோடு தொகுதி திமுக கூட்டணியான கொமதேகவுக்கு ஒதுக்கப்பட்டது.

இதில், நேற்று முன்தினம் திருச்செங்கோடு விவேகானந்தா கல்லூரியில் வாக்கு எண்ணிக்கை நடைபெற்றது. இதில் நாமக்கல், சேந்தமங்கலம் (ப/கு), ராசிபுரம் (தனி), திருச்செங்கோடு ஆகிய 4 தொகுதிகளை திமுக மற்றும் அதன் கூட்டணி கட்சிகளும், குமாரபாளையம், பரமத்திவேலூரில் அதிமுகவும் வெற்றி பெற்றன.

இதில், குமாரபாளையம் தொகுதியை கைப்பற்றிய அமைச்சர் பி.தங்கமணி தொடர்ந்து 3-வது முறையாக அதே தொகுதியில் வெற்றி பெற்றுள்ளார்.

இதுபோல், நாமக்கல் தொகுதியில் அதிமுக வேட்பாளர் கே.பி.பி. பாஸ்கர் தொடர்ந்து 3-வது முறையாக போட்டியிட்டார். எனினும், திமுக வேட்பாளர் ராமலிங்கத்திடம் தோல்வியை தழுவினார். ராசிபுரம் தொகுதியில் அமைச்சர் வி.சரோஜாவும், திருச்செங்கோடு தொகுதியில் பொன்.சரஸ்வதியும் 2-வது முறைாக போட்டியிட்டு தோல்வியை தழுவினர் என்பது குறிப்பிடத்தக்கது.

சேந்தமங்கலம் தொகுதியில் திமுக வேட்பாளர் பொன்னுசாமி, ராசிபுரத்தில் திமுக வேட்பாளர் மதிவேந்தன், திருச்செங்கோட்டில் திமுக கூட்டணியில் போட்டியிட்ட கொமதேக ஈஸ்வரன், பரமத்திவேலூரில் அதிமுக வேட்பாளர் எஸ்.சேகர் ஆகியோர் வெற்றி பெற்றுள்ளனர்.