மாவட்ட அளவிலான கிரிக்கெட் போட்டி

கோவை கோவை மாவட்ட கிரிக்கெட் சங்கம் சார்பில் 6-வது டிவிஷன் கிரிக்கெட் போட்டி கோவையில் நடைபெற்று வருகிறது. அதில், நேற்று நடைபெற்ற போட்டியில் இந்தியன் ஸ்போர்ட்ஸ் கிளப், ரெய்ன் டிராப்ஸ் அணிகள் மோதின. முதலில் விளையாடிய இந்தியன் ஸ்போர்ட்ஸ் கிளப் அணி 46 ஓவர்கள் முடிவில் 8 விக்கெட் இழப்புக்கு 246 ரன்கள் எடுத்தது. அதிகபட்சமாக நவீன்குமார் 67 ரன்களும், நவீன்ராஜ் 57 ரன்களும் எடுத்தனர். ரெய்ன் டிராப்ஸ் அணி வீரர் பாலசெந்தில்குமார் 37 ரன்கள் கொடுத்து 5 விக்கெட்டுகள் வீழ்த்தினார்.

மொத்தம் 247 ரன்களை இலக்காகக் கொண்டு விளையாடிய ரெய்ன் டிராப்ஸ் அணி 42.3 ஓவர்களில் அனைத்து விக்கெட்டுகளையும் இழந்து, 200 ரன் மட்டுமே எடுத்து தோல்வியடைந்தது. அதிகபட்சமாக ஷங்கர் 50 ரன்களும், சிவக்குமார் 35 ரன்களும் எடுத்தனர்.