வேளாண் கருவிகள் வாங்க ரூ.8.45 கோடி மதுரை ஆட்சியர் த.அன்பழகன் தகவல்

மதுரை மாவட்ட விவசாயிகளுக்கு வேளாண் கருவிகளை வாங்க கடந்த 3 ஆண்டுகளில் ரூ.8.45 கோடி வழங்கப்பட்டுள்ளதாக மதுரை ஆட்சியர் த.அன்பழகன் தெரிவித் துள்ளார்.

மதுரை வேளாண் கல்லூரியில் வேளாண் இயந்திரக் கண்காட்சியை ஆட்சியர் த.அன்பழகன் தொடங்கி வைத்து பேசியதாவது:

20 சிறு, குறு விவசாயிகள் இணைந்து கூட்டுப் பண்ணைத் திட்டம் மேற்கொள்ளலாம். 100 விவசாயிகள் இணைந்து உழவர் உற்பத்தியாளர்கள் குழுக்களை அமைக்கலாம். மதுரை மாவட்டத்தில் கடந்த 3 ஆண்டுகளில் 16,900 விவசாயிகள் ஒன்றிணைந்து 169 குழுக்களை அமைத்துள்ளனர். இக்குழுவுக்கு கடந்த 3 ஆண்டுகளில் ரூ.8.45 கோடி வழங்கப்பட்டுள்ளது.

இந்நிதியில் வாங்கப்பட்ட இயந்திரங்களை வாடகைக்கு விடுவதன் மூலம் ரூ.1.17 கோடி வருவாய் கிடைத்துள்ளது. இதை சுழல் நிதியாக விவசாயிகள் பயன்படுத்திக் கொள்ளலாம். குழுவின் 6 மாத செயல்பாடுகளை பொறுத்து வேளாண் இயந்திரங்கள் வாங்க தொகுப்பு நிதி வழங்கப்படும் என்றார்.

வேளாண் கல்லூரி முதல்வர் பால்பாண்டி, வேளாண் இணை இயக்குநர் த.விவேகானந்தன், கூட்டுறவு இணைப் பதிவாளர் ராஜேஷ் உள்ளிட்டோர் பங்கேற்றனர்.