சென்னை: அரசு ஸ்டான்லி மருத்துவக் கல்லூரி மருத்துவமனை ராயபுரம் பகுதியில் செயல்பட்டு வருகிறது. இங்கு 1,000-க்கும் மேற்பட்டோர் உள்நோயாளிகளாக சிகிச்சை பெற்று வருகின்றனர்.
தினமும் ஆயிரக்கணக்கானோர் புறநோயாளிகளாக சிகிச்சைக்கு வந்து செல்கின்றனர். மருத்துவமனை வளாகத்தில் உள்ள பழமையான கட்டிடங்களை புனரமைக்கும் பணிகள் நடைபெற்று வருகின்றன.
மருத்துவமனை டீன் அறையின் வரவேற்பு பகுதியில் நேற்று மேற்கூரை திடீரென்று பெயர்ந்து விழுந்ததில், அங்கிருந்த டீனின் உதவியாளர் காவியா என்பவர் காயமடைந்தார். உடனே அருகில் இருந்தவர்கள் அவரை மீட்டு சிகிச்சைக்காக சேர்த்தனர்.
தகவல் அறிந்து வந்த பொதுப்பணித் துறையினர், அந்த பகுதியில் பொதுமக்கள் யாரும் செல்லாமல் இருக்க தடுப்புகளை வைத்து அடைத்தனர். இது தொடர்பாக மருத்துவமனை போலீஸார் விசாரணை நடத்தி வருகின்றனர்.
