சென்னை: நடிகர் விஜய்யின் தவெக கட்சி, மோதிரம் சின்னத்தில் போட்டியிட இருப்பதாக தகவல்கள் வெளியாகியுள்ளன. தமிழக சட்டப்பேரவை தேர்தல் நெருங்கிவரும் சூழலில் முன்னேற்பாடுகளை தவெக கட்சி தீவிரப்படுத்தி வருகிறது.
தேர்தலில் போட்டியிடுவதற்கு பொதுவான சின்னம் வழங்கக் கோரி கடந்த மாதம் தேர்தல் ஆணையத்தில் தவெக மனு அளித்தது.
அதில் ஆட்டோ, கிரிக்கெட் பேட், விசில் உட்பட 10 சின்னங்கள் இடம்பெற்றிருந்தன. அதிலிருந்து ஒரு சின்னம் இறுதி செய்யப்பட்டுள்ளதாகவும், விரைவில் அறிவிப்பு வரலாம் எனவும் கூறப்படுகிறது.
அதன்படி தவெகவின் சின்னம் 4 தமிழ் எழுத்துகளை கொண்டதாக இருக்கலாம் என்றும், அது மோதிரமாக இருக்கக்கூடும் எனவும் தகவல்கள் கிடைத்துள்ளன.
இதுகுறித்து தவெக வட்டாரங்களில் விசாரித்தபோது, “கட்சியின் சின்னம் பெண்களை எளிதில் ஈர்க்கும் விதமாக மக்களிடம் சுலபமாக கொண்டு சேர்க்கும்படி இருக்க வேண்டுமென விஜய் விரும்புகிறார்.
அந்தவகையில் மோதிரம் சின்னம் தனித்துவமான பிராண்டாக மாறும். சின்னம் குறித்த அறிவிப்புக்காக கட்சியின் தொண்டர்கள் ஆவலுடன் காத்திருக்கின்றனர்” என்றனர்.
