சேலத்தில் குப்பையில் இருந்து மின்சாரம் தயாரிக்கும் திட்டம் அமைக்கப்பட உள்ள இடத்தை பார்வையிட்ட பாமக எம்எல்ஏ சவுமியா அன்புமணி.
சேலம்: வெள்ளக்கல்பட்டியில் குப்பையில் இருந்து தயாரிக்கும் திட்டத்தைச் செயல்படுத்த அனுமதிக்க மாட்டோம் என்று பாமக எம்எல்ஏ சவுமியா அன்புமணி தெரிவித்தார்.
சேலம் அருகே வெள்ளக்கல்பட்டியில் 90 ஏக்கர் பரப்பளவில் குப்பையை எரித்து மின்சாரம் தயாரிக்கும் திட்டத்தைச் செயல்படுத்த உள்ளதாக தமிழக அரசு அறிவித்துள்ளது. இத்திட்டத்துக்கு பல்வேறு தரப்பினரும் எதிர்ப்பு தெரிவித்து வருகின்றனர். இந்நிலையில், திட்டம் அமையவுள்ள இடத்தை பாமக எம்எல்ஏ சவுமியா அன்புமணி நேற்று பார்வையிட்டு, பொதுமக்களிடம் கருத்துகளை கேட்டறிந்தார்.
பின்னர், செய்தியாளர்களிடம் அவர் கூறியதாவது: சேலத்தில் 90 ஏக்கர் நிலத்தை கடந்த ஆட்சியிலேயே தேர்வு செய்துவிட்டனர். இந்த திட்டம் சுற்றுச்சூழலுக்கு மிகவும் ஆபத்தானது. காற்றாலை, சூரிய ஒளி மின்சாரம் போன்றவை சுற்றுச்சூழலுக்கு உகந்த திட்டங்கள். ஆனால், குப்பையை எரித்து மின்சாரம் தயாரிக்கும்போது புற்றுநோயை ஏற்படுத்தும் ரசாயனங்கள் வெளியாகி, மக்களின் உடல்நலத்தை பாதிக்கும்.
இந்த திட்டத்தைச் செயல்படுத்த அனுமதிக்க மாட்டோம். திட்டம் கைவிடப்படும்வரை சட்டரீதியான அழுத்தங்களைக் கொடுப்போம். குப்பையில் இருந்து மின்சாரம் தயாரிக்கும் திட்டம் உலக அளவில் தோல்வியடைந்த திட்டமாகும். எனவே, இத்திட்டத்தைக் கொண்டுவரக் கூடாது. இவ்வாறு அவர் தெரிவித்தார்.
