கொலை வழக்கில் கைது செய்யப்பட்ட நபர்கள். உள்படம்: கொலை செய்யப்பட்ட பாலமுருகன்
தூத்துக்குடி: டிஜிட்டல் பேனர் வைப்பதில் ஏற்பட்ட தகராறில் தூத்துக்குடியில் விடுதலைச் சிறுத்தைகள் கட்சி பிரமுகர் வெட்டிக் கொலை செய்யப்பட்டார். இதுதொடர்பாக திமுக நிர்வாகி உட்பட 5 பேர் கைது செய்யப்பட்டனர்.
தூத்துக்குடி தாளமுத்துநகர் சோட்டையன்தோப்பு பகுதியைச் சேர்ந்தவர் பாலமுருகன் என்ற பாலா (43). விடுதலைச் சிறுத்தைகள் கட்சியின் ஓட்டப்பிடாரம் ஒன்றிய முன்னாள் துணைச் செயலாளரான இவர், காய்கறி மற்றும் மளிகைக் கடை நடத்தி வந்தார்.
நேற்று காலை 6.30 மணி அளவில் சோட்டையன்தோப்பு பகுதியில் உள்ள பெட்ரோல் பங்கில் பெட்ரோல் போடுவதற்காக மோட்டார் சைக்கிளுடன் பாலமுருகன் நின்று கொண்டிருந்தார். அப்போது, அங்கு மோட்டார் சைக்கிளில் வந்த சிலர், பாலமுருகனை அரிவாளால் சரமாரியாக வெட்டி விட்டு தப்பினர். இதில் பலத்த காயமடைந்த பாலமுருகன் சம்பவ இடத்திலேயே உயிரிழந்தார்.
தகவல் அறிந்ததும் திருநெல்வேலி சரக டிஐஜி திருநாவுக்கரசு, தூத்துக்குடி எஸ்பி சிவபிரசாத், டிஎஸ்பி குருவெங்கட்ராஜ், தாளமுத்துநகர் காவல் ஆய்வாளர் பாலமுருகன் மற்றும் போலீஸார் சம்பவ இடத்துக்கு விரைந்து சென்று விசாரணை நடத்தினர். பாலமுருகனின் உடலை கைப்பற்றி பிரேத பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்தனர்.
இந்நிலையில், கொலையாளிகளை விரைந்து கைது செய்ய வலியுறுத்தி பாலமுருகனின் குடும்பத்தினர், உறவினர்கள் தாளமுத்துநகர் ஆரோக்கியபுரம் சந்திப்பு பகுதியில் சாலை மறியலில் ஈடுபட்டனர். டிஐஜி திருநாவுக்கரசு, எஸ்பி சிவபிரசாத் ஆகியோர் பேச்சுவார்த்தை நடத்தினர். கொலை சம்பவத்தில் ஈடுபட்டவர்களை கைது செய்ய 4 தனிப்படை அமைக்கப்பட்டுள்ளன. கொலையாளிகள் விரைவில் கைது செய்யப்படுவார்கள் என அவர்கள் உறுதி அளித்தனர். அதன்பேரில் போராட்டம் கைவிடப்பட்டது.
போலீஸார் நடத்திய விசாரணையில், உறவினரின் மகள் பூப்புனித நீராட்டு விழாவுக்காக, நேற்று முன்தினம் இரவு பாலமுருகன் தாளமுத்துநகர் பகுதியில் டிஜிட்டல் பேனர் வைத்துள்ளார். அப்போது அங்கு வந்த சிலர், அந்த பகுதியில் பேனர் வைக்கக்கூடாது என தகராறு செய்துள்ளனர். இதனால் இருதரப்பினர் இடையே கைகலப்பு ஏற்பட்டுள்ளது. இதில் ஆத்திரமடைந்த அந்த நபர்கள், பாலமுருகனை தொடர்ந்து கண்காணித்து கொலை செய்துள்ளனர் என்பது தெரியவந்தது.
இந்த கொலை தொடர்பாக தாளமுத்து நகர் பாலதண்டாயுதம் நகரைச் சேர்ந்த சிவா என்ற சிவச்சந்திரன் (22), தூத்துக்குடி கே.வி.கே. நகரை சேர்ந்த சிவகுமார் (22), லூர்தம்மாள்புரத்தை சேர்ந்த கோகுல்நாத் (24), சோட்டையன்தோப்பை சேர்ந்த மணிகண்டன் (20) மற்றும் தூத்துக்குடி தெற்கு மாவட்ட திமுக சுற்றுச்சூழல் அணி அமைப்பாளரான மாதாநகர் 5-வது தெருவைச் சேர்ந்த பொன்பாண்டி என்ற ரவி (44) ஆகிய 5 பேர் கைது செய்யப்பட்டுள்ளனர். தொடர்ந்து விசாரணை நடைபெற்று வருகிறது.
