போரூர் ஸ்ரீராமச்சந்திரா உயர் கல்வி மற்றும் ஆராய்ச்சி நிறுவனத்தின் 42-வது பட்டமளிப்பு விழா நேற்று நடந்தது. விழாவில் சிறப்பு விருந்தினராக பங்கேற்ற மத்திய அறிவியல், தொழில் நுட்பம் மற்றும் புவி அறிவியல் துறை அமைச்சர் ஜிதேந்திர சிங், தேர்வில் சிறப்பாக தேர்ச்சி பெற்ற மாணவர்களுக்கு பட்டங்கள், தங்கப் பதக்கங்களை வழங்கினார். ஸ்ரீராமச்சந்திரா உயர் கல்வி மற்றும் ஆராய்ச்சி நிறுவனத்தின் வேந்தர் வி.ஆர்.வெங்கடாசலம், இணைவேந்தர் ஆர்.வி.செங்குட்டுவன் ஆகியோர் உடன் உள்ளனர்.
சென்னை: சென்னை போரூரில் உள்ள ஸ்ரீராமச்சந்திரா உயர் கல்வி மற்றும் ஆராய்ச்சி நிறுவனத்தின் 42-வது பட்டமளிப்பு விழா நேற்று நடந்தது.
இந்த விழாவில் சிறப்பு விருந்தினராக பங்கேற்ற மத்திய அறிவியல், தொழில்நுட்பம் மற்றும் புவி அறிவியல் துறை அமைச்சர் ஜிதேந்திர சிங், தேர்வில் சிறப்பாக தேர்ச்சி பெற்ற மாணவர்களுக்கு 106 தங்கப்பதக்கங்களை வழங்கினார்.
தொடர்ந்து, ஸ்ரீராமச்சந்திரா உயர் கல்வி மற்றும் ஆராய்ச்சி நிறுவனத்தின் வேந்தர் வி.ஆர். வெங்கடாசலம், இணைவேந்தர் ஆர்.வி. செங்குட்டுவன் ஆகியோர் மருத்துவம், பொறியியல் மற்றும் மேலாண்மை துறைகளில் 2116 மாணவர்களுக்கு முனைவர், முதுநிலை மற்றும் இளநிலை பட்டங்களை வழங்கினர்.
விழாவில் மத்திய அமைச்சர் ஜிதேந்திர சிங் பேசியதாவது: 21-ம் நூற்றாண்டின் புதிய தொழில்நுட்பங்களான செயற்கை நுண்ணறிவு, மரபணுவியல், குவாண்டம் தொழில்நுட்பம் ஆகியவை மருத்துவத்துறையில் பெரும் தாக்கத்தை ஏற்படுத்துகின்றன.
தொழில்நுட்பம் வளர்ந்துள்ளதால், மருத்துவத்தின் தன்மை குறைந்து விடாமல் செயற்கை நுண்ணறிவை கையாளுவதே இன்றைய இளம் மருத்துவர்களின் சவாலாகும்.
முந்தைய காலங்களில் காசநோய், மலேரியா போன்ற பரவும் நோய்கள் மட்டுமே சவாலாக இருந்தது. ஆனால், தற்போது நீரிழிவு மற்றும் மாரடைப்பு போன்ற தொற்றா நோய்கள் இளைய தலைமுறையினரை அதிகம் தாக்குவது பெரும் சவாலாக உள்ளது.
பிரதமரின் வளர்ந்த இந்தியா 2047 என்ற இலக்கை அடைய இளைஞர்களின் ஆற்றல் மிகவும் அவசியம். தடுக்கக்கூடிய நோய்களால், அவர்களின் ஆற்றல் வீணா வதை தடுக்க அரசு மற்றும் தனியார் துறைகள் ஒன்றிணைந்து செயல்பட வேண்டும். இளைஞர்களின் ஆரோக்கியமே வளர்ந்த இந்தியாவின் இலக்கு ஆகும். இவ்வாறு அவர் தெரிவித்தார்.
இந்த விழாவில் ஸ்ரீராமச்சந்திரா கல்வி மற்றும் மருத்துவ அறக்கட்டளையின் அறங்காவலர் சம்யுக்தா வெங்கடாசலம், மருத்துவ கல்லூரி தலைவர் மருத்துவர் கே.பாலாஜி சிங், பதிவாளர் மருத்துவர் எஸ்.செந்தில்குமார், ஆய்வுத்துறை தலைவர் மருத்துவர் பி.வெங்கடாசலம், தேர்வுகள் கண்காணிப்பாளர் மருத்துவர் ஆர்.பத்மாவதி, நிதித்துறை இயக்குநர் ஜே.ரவிசங்கர் உள்ளிட்டோர் கலந்து கொண்டனர்.
