முதல்வர் விஜய், பிரதமர் மோடி | கோப்புப்படம்
சென்னை: சென்னையில் உச்ச நீதிமன்றக் கிளை அமைக்க நடவடிக்கை கோரி பிரதமர் மோடிக்கு முதல்வர் விஜய் கடிதம் எழுதியுள்ளார்.
இதுகுறித்து நேற்று அவர் எழுதிய கடிதத்தில் கூறியுள்ளதாவது: உச்ச நீதிமன்றக் கிளையை சென்னையில் அமைக்க வேண்டும் என்ற கோரிக்கை கடந்த 1980-ம் ஆண்டிலேயே தமிழக அரசால் முன்வைக்கப்பட்டது. தென்னிந்தியாவின் முக்கிய பெருநகரமான சென்னையில் இக்கிளையை அமைப்பது, அனைத்து தென்மாநிலங்களுக்கும் பயனுள்ளதாக அமையும்.
நமது அரசி யலமைப்புச் சட்டம் இயற்றப்பட்டபோது, ஏழை - பணக்காரர் என்ற பாகுபாடின்றி நாட்டின் அனைத்துக் குடிமக்களும் நீதிமன்றத்தை நேரடியாக அணுகும் வாய்ப்பைப் பெறவேண்டும் என்றே அதை உருவாக்கிய சான்றோர் விரும்பினர். இதற்கான பிரிவு 32-ன் கீழான தீர்வானது, புவியியல் ரீதியாக
உச்ச நீதிமன்றத்துக்கு அருகில் வசிப்பவர்கள் மற்றும் வழக்கு, பயணச் செலவை பொருட்டாக கருதாதவர்களுக்கு மட்டுமே நடைமுறையில் சாத்தியமான ஒன்றாக மாறியுள்ளது.
இதனால், டெல்லிக்கும் தென்னிந்திய மாநிலங்களுக்கும் இடையே உள்ள தொலைவு காரணமாகவே இச்சலுகையைப் பெறும் வாய்ப்பை தென்னிந்திய மக்கள் இழக்க நேரிடுகிறது.
மேலும், உச்ச நீதிமன்றத்தில் தொடரப்பட்ட வி.வசந்தகுமார் - எச்.சி.பாட்டியா மற்றும் சிலர் இடையிலான வழக்கில் உச்ச நீதிமன்றம் 2016 ஜூலை 13-ம் தேதி பிறப்பித்த உத்தரவில், எழுப்பப்பட்ட சட்டரீதியான கேள்விகளில், உச்ச நீதிமன்றத்தின் அமர்வை அமைப்பது என்பதும்
ஒன்றாகும். இதுகுறித்து ஒரு உறுதியான முடிவைப் பெறுவதற்காக அரசியலமைப்பு அமர்வை அமைக்கவும் பரிந்துரை செய்யப்பட்டுள்ளது. அவ்வாறே, இந்த வழக்கு உச்ச நீதிமன்றத் தலைமை நீதிபதி தலைமையிலான 5 நீதிபதிகள் அடங்கிய அரசியலமைப்பு அமர்வுக்கு அனுப்பி வைக்கப்பட்டுள்ளது.
எனவே, தென்னிந்திய மாநிலங்களில், சென்னையின் முக்கியத்துவத்தையும், தமிழகத்தின் நீண்டகாலக் கோரிக்கையைக் கருத்தில் கொண்டும் சென்னையில் உச்ச நீதிமன்ற அமர்வை அமைப்பது குறித்த நீதிமன்றத்தின் நிலைப்பாட்டை மறுபரிசீலனை செய்து, சாதகமான முடிவைப் பெற தாங்கள் நடவடிக்கை எடுக்க வேண்டும். இவ்வாறு கூறியுள்ளார்.
