சென்னை: திடக்கழிவு மேலாண்மை பொறுப்பு ஊரக வளர்ச்சித் துறைக்கு மாற்றப்பட்டதால், நகர்ப்புற கழிவுகளை கிராமங்களில் கொட்டப்படும் அபாயம் உள்ளதாக ஊரக வளர்ச்சித் துறை ஊராட்சி நிர்வாகங்களும் கடும் எதிர்ப்பு தெரிவித்துள்ளன.
தமிழகத்தில் திடக்கழிவு மேலாண்மையை மேம்படுத்துவதற்காக, சிறப்புத் திட்ட செயலாக்கத் துறையின் கீழ் ‘க்ளீன் தமிழ்நாடு கம்பெனி லிமிடெட்’ (CTCL) மற்றும் ‘தூய்மை இயக்கம்’ செயல்பட்டு வந்தன. நிர்வாக வசதிக்காக இவற்றின் ஒட்டுமொத்த செயல்பாடுகளையும் ஊரக வளர்ச்சித் துறைக்கு மாற்றி தமிழக அரசு சமீபத்தில் அரசாணை வெளியிட்டது.
அரசின் இந்த முடிவுக்கு தற்போது ஊரக வளர்ச்சித் துறைக்குள்ளேயே கடும் அதிருப்திகள் எழுந்துள்ளன. இதுகுறித்து ஊரக வளர்ச்சித் துறை அதிகாரிகள் கூறியதாவது: தமிழகத்தில் உள்ள 25 மாநகராட்சிகள், 146 நகராட்சிகள் மற்றும் 479 பேரூராட்சிகளில் தினமும் உருவாகும் பல்லாயிரம் டன் திடக்கழிவுகளை அந்தந்த நகர்ப்புற உள்ளாட்சி அமைப்புகளே கையாண்டு வந்தன.
இவற்றை ஒருங்கிணைத்து நவீன முறையில் செயல்படுத்துவதற்காகவே முந்தைய திமுக ஆட்சியில் சிறப்புத்திட்ட செயலாக்கத் துறையின் கீழ் ‘க்ளீன் தமிழ்நாடு கம்பெனி’ உருவாக்கப்பட்டது.
ஆனால், தவெக ஆட்சியில் நகர்ப்புற குப்பைகளை கையாளும் பொறுப்பு ஊரக வளர்ச்சித் துறைக்கு மாற்றப்பட்டுள்ளது. இது நகர்ப்புறங்களில் சேரும் குப்பைகளை கையாளும் பொறுப்பை கிராமங்களின் தலையில் கட்டுவதற்கே வழிவகுக்கும்.
இந்தச் சிக்கல்களை தவிர்க்கவே சென்னை, நீலகிரி தவிர மற்ற 36 மாவட்டங்களில் நகரங்களை ஒட்டியுள்ள 673 ஊராட்சிகளில் குடிநீர், சாலை, வடிகால் மற்றும் திடக்கழிவு மேலாண்மையை மேம்படுத்துவதற்காக ‘நகர்ப்புற வளர்ச்சி இயக்குநரகம்’ என்ற புதிய அமைப்பை உருவாக்கும் பணிகள் நடந்துவந்தன.
ஆனால், அதை நிறுத்திவிட்டு நகர்ப்புற திடக்கழிவுகளை கையாளும் பொறுப்பை எங்களிடம் கொடுத்தது ஏற்புடையதல்ல.
ஏற்கெனவே கிராம ஊராட்சிகளில் சேரும் குப்பைகளை முறைப்படி தரம் பிரித்து கையாள போதுமான நிதி இல்லை. இதனால் பல்வேறு ஊராட்சிகளில் ஏரி, குளங்கள் போன்ற நீர்நிலைகளில்தான் குப்பைகள் கொட்டப்படுகின்றன.
தற்போது நகர்ப்புற கழிவுகளையும் கிராமங்களை நோக்கி திருப்பினால், அவை குப்பைக் கிடங்குகளாக மாறிவிடும். எனவே, இந்த முடிவை தமிழக அரசு கைவிட வேண்டும். இவ்வாறு அவர்கள் தெரிவித்தனர்.
