தாராபுரம்: திமுக தலைவர் மு.க.ஸ்டாலின்,அதிமுக பொதுச் செயலாளர் பழனிசாமி ஆகியோர் தாராபுரம் தொகுதியில் இன்று ரோடு ஷோ நடத்தி வாக்கு சேகரிக்கின்றனர். முதல்வர் விஜய் வரும் 4-ம் தேதி மீண்டும் தாராபுரத்தில் பிரச்சாரம் செய்கிறார்.
தாராபுரம் தொகுதியில் இடைத்தேர்தல் பிரச்சாரம் களைகட்டி வருகிறது. திமுக, தவெக, அதிமுக உள்ளிட்ட முக்கிய கட்சிகளின் தலைவர்கள் பிரச்சாரத்தை தீவிரப்படுத்தி உள்ளனர்.
இந்நிலையில், திமுக வேட்பாளர் சுகன்யாவை ஆதரித்து, கட்சியின் தலைவர் மு.க.ஸ்டாலின் தாராபுரத்தில் இன்று (அக். 2) பிரச்சாரம் செய்ய உள்ளார். இதற்காக நேற்று இரவு விமானத்தில் கோவை வந்த மு.க.ஸ்டாலின், தாராபுரம் அருகேயுள்ள கள்ளி மந்தயம் பகுதியில் முன்னாள் அமைச்சர் அர.சக்கரபாணிக்கு சொந்தமான இல்லத்தில் தங்கினார்.
இன்று காலை தாராபுரம் பேருந்து நிலைய பகுதியில் ரோடு ஷோ தொடங்குகிறார். 15 முக்கிய சாலைகள் வழியாக ரோடு ஷோ நடத்த திட்டமிடப்பட்டுள்ளது. மாலை 5 மணி அளவில் தாராபுரம் - உடுமலை சாலையில் சித்தராவுத்தன்பாளையம் மாருதி நகரில் நடைபெறும் பிரம்மாண்ட பொதுக்கூட்டத்தில் பேசுகிறார்.
அதிமுக வேட்பாளர் பானுமதியை ஆதரித்து கட்சியின் பொதுச் செயலாளர் கே.பழனிசாமி செப். 27, 28-ம் தேதிகளில் பிரச்சாரத்தில் ஈடுபட்டார். 2-வது கட்டமாக இன்று மாலை 4 மணி அளவில் தாராபுரம் தொகுதிக்கு உட்பட்ட தளவாய்பட்டணத்தில் தேர்தல் பிரச்சாரத்தை தொடங்குகிறார்.
தாராபுரம் அலங்கியம் சாலையில் இருந்து அண்ணா சிலை வரையில் ரோடு ஷோ செல்கிறார். மாலை 6 மணி அளவில் தாராபுரம் காவல் நிலையம் அருகில் பேசுகிறார்.
முதல்வர் ரோடு ஷோ: தவெக வேட்பாளர் சத்யபாமாவை ஆதரித்து கட்சித் தலைவரும், முதல்வருமான விஜய் தாராபுரத்தில் நேற்று முன்தினம் ரோடு ஷோ நடத்தினார். பொதுக்கூட்டத்திலும் பங்கேற்றார். பிரச்சாரத்தின் இறுதி நாளான வரும் 4-ம் தேதி மீண்டும் தாராபுரம் வரும் முதல்வர் விஜய், பிரம்மாண்ட ரோடு ஷோவில் பங்கேற்க உள்ளதாக கட்சி நிர்வாகிகள் தெரிவித்தனர்.
திமுக இளைஞரணி செயலாளர் உதயநிதி ஸ்டாலின் ஏற்கெனவே பிரச்சாரம் செய்த நிலையில், மீண்டும் நாளை (3-ம் தேதி) தாராபுரத்தில் பிரச்சாரம் செய்கிறார்.
