தஞ்சாவூர் கீழவாசல் பகுதியில் நேற்று சிறப்பு புலனாய்வு பிரிவு போலீஸார் சோதனை நடத்திய வீடு.
தஞ்சாவூர்: தடை செய்யப்பட்ட இயக்கத்துடன் தொடர்பு உள்ளதா என்பது குறித்து தஞ்சாவூரில் 6 பேரின் வீடுகளில் சிறப்பு புலனாய்வுப் பிரிவினர் நேற்று சோதனை நடத்தினர்.
தஞ்சாவூரில் இளைஞர்களை மூளைச்சலவை செய்து தடை செய்யப்பட்ட கிலாபத் இயக்கத்தில் சேர்ப்பதாக சிறப்பு புலனாய்வுப் பிரிவு போலீஸாருக்கு ரகசிய தகவல் கிடைத்தது.
இதன்பேரில், தஞ்சாவூர் மாவட்ட முதன்மை அமர்வு நீதிமன்றத்தில் அனுமதி பெற்று, சிறப்பு புலனாய்வுப் பிரிவு டிஎஸ்பி சார்லஸ் மேற்பார்வையில் நேற்று தஞ்சாவூரில் 6 இடங்களில் போலீஸார் சோதனை நடத்தினர்.
தஞ்சாவூர் கீழவாசல் எஸ்என்எம் நகரைச் சேர்ந்த ஜாகீர் உசேன், அவரது சகோதரர் அப்துல், கீழ்வாசல் டவுன் கரம்பை காவேரி நகரைச் சேர்ந்த உமர்முக்தர், அவரது சகோதரர் யாசல் அப்துல், கீழவாசல் ராமசாமிபேட்டையைச் சேர்ந்த சம்சுதீன், கீழவாசல் ரகுமான் நகரைச் சேர்ந்த சேக்பரீத் ஆகிய 6 பேரின் வீடுகளில் இந்த சோதனை நடைபெற்றது.
அப்போது, தடை செய்யப்பட்ட இயக்கம் மற்றும் மதம் சார்ந்த 20-க்கும் மேற்பட்ட புத்தகங்கள், 5 செல்போன்கள், லேப்டாப், பென்டிரைவ்களை போலீஸார் கைப்பற்றிச் சென்றனர்.
இந்நிலையில், இஸ்லாமிய இளைஞர்களைச் சீர்படுத்தும் பணியிலும், சமூக சீர்திருத்தப் பணிகளிலும், தாங்கள் ஈடுபட்டுவரும் நிலையில், இந்த சோதனை இஸ்லாமியர்கள் மீது தவறான பிம்பத்தை ஏற்படுத்தும் வகையில் உள்ளதாக சோதனைக்கு உள்ளான குடும்பத்தினர் குற்றம்சாட்டினார்.
