

சென்னை: ‘சோனியா காந்தி நூல் வெளியீட்டு விழாவுக்கு அழைப்பிதழ் வந்ததா?’ என்பது குறித்து திமுக தலைவர் மு.க.ஸ்டாலின் விளக்கம் அளித்துள்ளார்.
தமிழக சட்டப்பேரவை தேர்தலுக்கு முன்பு வரை நாடாளுமன்ற எதிர்க்கட்சி தலைவர் ராகுல் காந்தியும், திமுக தலைவர் மு.க.ஸ்டாலினும் சகோதரத்துவத்துடன் பழகி வந்தனர். ஆனால் தேர்தல் நேரத்தில் சீட் பகிர்வு தொடர்பாக பேச்சுவார்த்தை நடத்த ராகுல் காந்தியை ஸ்டாலின் பலமுறை தொடர்பு கொண்டும் அவர் ஏற்கவில்லை எனக் கூறப்படுகிறது. அதேபோல். தேர்தல் பிரச்சாரத்திலும் இருவரும் இணைந்து பங்கேற்கவில்லை.
தேர்தல் முடிவுகள் தவெகவுக்கு சாதகமாக அமைந்தது. இதையடுத்து திமுக கூட்டணியில் இருந்து வெளியேறி முதல் ஆளாக தவெகவுக்கு காங்கிரஸ் ஆதரவு கொடுத்தது. மேலும், மாநில தலைவர் மாணிக்கம் தாகூர் போன்றவர்கள் திமுக தலைமையை கடுமையாக விமர்சித்து வருகின்றனர். திமுக தலைவர்களும் காங்கிரஸை விமர்சனம் செய்கின்றனர். இந்தச் சூழலில், டெல்லியில் நேற்று முன்தினம் காங்கிரஸ் மூத்த தலைவர் சோனியா காந்தி எழுதிய நூல் வெளியீட்டு விழா நடைபெற்றது.
இதில், முதல்வர் விஜய் உள்ளிட்ட தலைவர்கள் கலந்து கொண்டனர். இதற்கிடையே, இந்த நிகழ்வில் பங்கேற்குமாறு அழைப்பு விடுப்பதற்காக மு.க.ஸ்டாலினுடன் பேச ராகுல் காந்தி முயன்றதாகவும், ஆனால், ஸ்டாலின் பேச விரும்பாமல் அழைப்பைத் தவிர்த்துவிட்டார் எனவும் செய்திகள் வெளியாகின. இது பரபரப்பை ஏற்படுத்தியது.
இதுகுறித்து அண்ணா அறிவாலயத்தில் நேற்று செய்தியாளர்களிடம் ஸ்டாலின் கூறும்போது, “சோனியா காந்தி நூல் வெளியீட்டு விழாவில் பங்கேற்க வேண்டும் என எனக்கு அழைப்பிதழ் வரவில்லை. தொலைபேசியில் என்னுடைய உதவியாளரிடம் தெரிவித்தனர். அதன் அடிப்படையில் வாழ்த்து தெரிவித்தேன். கடிதமும் அனுப்பி இருக்கிறேன்” என்றார்.
முன்னதாக இதுகுறித்து திமுக அமைப்புச் செயலாளர் ஆர்.எஸ்.பாரதி கூறும்போது, “அழைப்பை ஏற்பதும் ஏற்காததும் எங்களுடைய விருப்பம். ஏற்குமாறு யாரும் கட்டாயப்படுத்த முடியாது. அழைப்பு வந்திருக்கலாம். ஏனென்றால் சோனியா காந்தி எங்கள் தலைவர் மீது மிகுந்த மரியாதை கொண்டவர். அதுபோல்தான் எங்களது தலைவரும். நிகழ்ச்சியில் கலந்துகொள்வது என்பது வசதி, சூழ்நிலைக்கு ஏற்ப அமையும்” என்றார்.