கதர் கட்சியின் தேசியத் தலைமைக்கு விரைவில் தேர்தல் அறிவிக்கப் போகிறார்களாம். கடந்த முறை பெரியவரை கோதாவில் இறக்கிவிட்டது தலைமைக் குடும்பம். அவரை எதிர்த்து, அடிக்கடி சர்ச்சைக்குள் சிக்கிக் கொள்ளும் மலபார் தேசத்து எம்.பி. படை திரட்டினார். அவருக்கு ஆதரவாக தமிழகத்தில் வாரிசு எம்.பி. ஒருவர் வரிந்து கட்டினார். அதுதான் கதர் கட்சி ஜனநாயகம் என்று சொன்னார்கள்; கேட்க நன்றாக இருந்தது.
ஆனால் தேர்தலில், தலைமைக் குடும்பம் நிறுத்திய பெரியவர் வெற்றி பெற்றதற்காக சொந்தத் தொகுதியில் இனிப்பு வழங்கிய ‘தீரர்’ பெயர் கொண்ட மாவட்டத் தலைவரை கர்வம் கட்டி பதவியில் இருந்து தூக்கிவிட்டார் வாரிசு எம்.பி. இந்த நிலையில், இப்போது பெரியவருக்குப் பதிலாக தலைமைக் குடும்பத்தின் பெண் வாரிசை தலைவர் பதவிக்கு பரிந்துரைக்கும் திட்டத்தில் இருக்கிறார்களாம்.
வழக்கம்போல மலபார் தேசத்து எம்.பி.யும், வாரிசு எம்.பி.யும் சேர்ந்து போட்டி வேட்பாளரை நிறுத்த இப்போதே ஆயத்தமாகி வருகிறார்களாம். இம்முறையும் மலபார் மனிதரே கோதாவில் குதிக்கலாம் என்கிறார்கள்.
இந்த நிலையில், அண்மையில் வாரிசு எம்.பி.யுடன் நான்கு நாட்கள், சீமைப் பக்கம் உள்ள அவரது தோட்டத்து பங்களாவுக்கே வந்து தங்கி இருந்தாராம் மலபார் தலை. தோட்டத்து வீட்டில், நட்சத்திரப்படி தனது தந்தையாரின் பிறந்த நாளை கொண்டாடிய வாரிசு எம்.பி.பங்களா வாசலில் இருக்கும், கேட்டதெல்லாம் கொடுக்கும் பிள்ளையாருக்கு சிறப்பு பூஜை எல்லாம் செய்தாராம்.
இதனிடையே இவர், மலபார் தலையுடன் சேர்ந்து ‘சக்தி’ ஆலோசனை நடத்திய விவகாரம் பவன் வரைக்கும் எட்டிவிட்டதாம். இருவருக்குமே தலைக்கு மேல் ‘கத்தி’ தொங்குகிறது. அதிலிருந்து சமாளிக்க வேண்டுமானால் மலர்க் கட்சித் தலைவர்களை ‘ஐலசா’ போடவைக்கும் விதமாக கட்சிக்குள் ஏதாவது ‘புரட்சி’ செய்ய வேண்டும் என்பதற்காகவே இவர்கள் இப்படிச் செய்கிறார்கள் என்று பவன் வட்டார போக்குவரத்தில் இருப்பவர்கள் பல்லைக் கடிக்கிறார்களாம்.
