சென்னை: ஜெம் வீரமணி பாலியல் லீலை களுக்கு உடந்தையாக இருந்த சாந்தி மற்றும் அவரது கணவர் மகேந்திர சிம்கனிடம் போலீஸார் தங்கள் காவலில் விடிய, விடிய விசாரணை நடத்தினர்.
ஜெம் கிரானைட் வீரமணியின் பாலியல் குற்றச்சாட்டுகள் தொடர்பான விவகாரத்தில், அவரது உதவியாளரும் நெருங்கிய தோழியுமான சாந்தி மற்றும் அவரது கணவர் மகேந்திர சிம்கன் ஆகியோர் உடந்தையாக இருந்ததாக போலீஸாரின் விசாரணையில் தெரியவந்தது. மேலும், அவர்கள் இடைத்தரகர்களாக செயல்பட்டு சிறுமிகளை வீரமணியிடம் அழைத்துச் சென்றதாகவும் போலீஸார் விசாரித்து வருகின்றனர்.
இந்த விவகாரம் வெளிச்சத்துக்கு வந்ததைத் தொடர்ந்து, முதல் கட்டமாக வீரமணி கைது செய்யப்பட்டார். அவரை போலீஸார் 3 நாட்கள் காவலில் எடுத்து விசாரணை நடத்தினர்.
இதன் அடிப்படையில், சாந்தி, அவரது கணவர் மகேந்திர சிம்கன் மற்றும் மற்றொரு உதவியாளர் கணேசன் ஆகியோரும் கைது செய்யப்பட்டு சிறையில் அடைக்கப்பட்டனர். தற்போது சாந்தி மற்றும் அவரது கணவர் மகேந்திர சிம்கனை போலீஸார் நேற்று முன்தினம் முதல் 3 நாட்கள் காவலில் எடுத்து விசாரணை நடத்தி வருகின்றனர்.
விசாரணையின்போது, பல்வேறு அதிர்ச்சி தகவல்களை அவர்கள் தெரிவித்தனர். குறிப்பாக, சிறுமிகளை எவ்வாறு நோட்டமிடுவது, பின்னர் அவர்களை எவ்வாறு அணுகுவது, தொடர்ந்து பாலியல் ரீதியாக பயன்படுத்திக் கொண்டதாக கூறப்படும் சம்பவங்கள் மற்றும் தொழில் நண்பர்களுடன் சிறுமிகளை தனிமையில் இருக்கச் செய்து காரியம் சாதித்ததாக கூறப்படும் சம்பவங்கள் குறித்து அவர்கள் தெரிவித்ததாக போலீஸ் தரப்பில் கூறப்படுகிறது.
மேலும், வீரமணியின் அந்தரங்க நடவடிக்கைகளை வீடியோவாக பதிவு செய்து, அதை காண்பித்து பணம் பறித்ததாகவும், தொடர்ந்து பணம் பறிக்கும் நோக்கில் சில முக்கிய பிரமுகர்களை அணுகியதாகவும் விசாரணையில் தகவல்கள் வெளியாகியுள்ளது. வீரமணி தொடர்புடைய இடங்களில் பறிமுதல் செய்யப்பட்ட ஆவணங்களை காண்பித்தும் விசாரித்துள்ளனர். அதற்கு இருவரும் அளித்த பதில்களை போலீஸார் வீடியோவாகவும், வாக்குமூலமாகவும் பதிவு செய்துள்ளனர். இந்த வாக்குமூலங்களின் அடிப்படையில் விசாரணையை போலீஸார் தீவிரப்படுத்தியுள்ளனர்.
போலீஸாரின் பிடியில் உள்ள சாந்தி சமூக வலைதளமான இன்ஸ்டா பக்கத்தில் அவ்வப்போது வீடியோக்களை வெளியிடும் பழக்கத்தை வைத்திருந்துள்ளார். எப்போதெல்லாம் அதீத மகிழ்ச்சியில் திளைத்துள்ளாரோ அப்போதெல்லாம் பாடல்களை இணைத்து ஒலிக்கச் செய்து நடனமாடி மகிழ்ந்துள்ளார். இப்படி, ஒரு பட்டாம்பூச்சி நெஞ்சுக்குள்ளே சுற்றுகின்றதே பாடல், சேட்டன் வந்தலே.. சேட்டன் வந்தலே.. என்ற பாடல், பட்டத்து ராணி பார்க்கும் பார்வை வெற்றிக்குத்தான் என எண்ண வேண்டும், என்னென்னவோ.. என்நெஞ்சிலே உள்பட 50-க்கும் மேற்பட்ட பாடல்களுக்கு வித விதமான உடைகளுடன் நடனமாடி உள்ளார். இந்த பாடல்கள் தற்போது சமூக வலைதளங்களில் வைரலாகி வருகிறது.
