சென்னை: பூந்தமல்லி - வடபழனி இடையே மெட்ரோ ரயில் இன்று தொடங்க உள்ள நிலையில் நெரிசலான நேரங்களில் 10 நிமிடத்துக்கு ஒரு ரயில் இயக்கப்படும் என மெட்ரோ நிர்வாகம் அறிவித்துள்ளது.
இதுகுறித்து வெளியிடப்பட்டுள்ள செய்தி குறிப்பு: பூந்தமல்லி புறவழிச்சாலை முதல் வடபழனி வரையிலான 15 கிமீ வழித்தடத்தில் பயணிகள் சேவை இன்று முதல் தொடங்கப்படுகிறது. இன்று மாலை 4 மணிமுதல் இரவு 9 மணி வரை ரயில் இயக்கப்படும். அதனைத்தொடர்ந்து, நாளை முதல் தினசரி காலை 7 மணி முதல் இரவு 9 மணி வரை சேவைகள் வழங்கப்படும்.
இதில், திங்கட்கிழமை முதல் சனிக்கிழமை வரையிலான நாட்களில், கூட்ட நெரிசலான நேரமான காலை 8 முதல் 11 மணி வரையிலும், மாலை 5 முதல் இரவு 8 மணி வரையிலும் ஒவ்வொரு 10 நிமிட இடைவெளியில் ரயில்கள் இயக்கப்படும். மற்ற நேரங்களில் 15 நிமிட இடைவெளியில் ரயில்கள் இயக்கப்படும்.
ஞாயிற்றுக்கிழமை மற்றும் பொது விடுமுறை நாட்களில் நெரிசல் நேரச் சேவைகள் இருக்காது. அந்நாட்களில் 15 நிமிட இடைவெளியில் ரயில்கள் இயக்கப்படும். கட்டணமாக குறைந்தபட்சம் ரூ.10-ம் அதிகபட்சமாக ரூ.40 நிர்ணயிக்கப்பட்டுள்ளது.
