சென்னை: கரோனா காலகட்டத்தில் சென்னை உயர் நீதிமன்றத்தில் காணொலி வாயிலாக வழக்கு விசாரணை நடைபெற்றது. அப்போது, விசாரணைக்கு ஆஜரான வழக்கறிஞர் சந்தானகிருஷ்ணன் தனது ஜூனியர் பெண் வழக்கறிஞரிடம் தகாத முறையில் நடந்துகொண்ட வீடியோ காட்சிகள் நேரலையில் ஒளிபரப்பாகின. இந்த காட்சிகள் வலைதளங்களிலும் பரவின. இதையடுத்து, சந்தானகிருஷ்ணனுக்கு எதிராக நீதிமன்ற அவமதிப்பு வழக்கு தொடரப்பட்டது. அவர் கைது செய்யப்பட்டு, பின்னர் ஜாமீனில் விடுவிக்கப்பட்டார்.
இந்த வழக்கை ரத்து செய்யக் கோரி சென்னை உயர் நீதிமன்றத்தில் அவர் மனு தாக்கல் செய்தார். நீதிபதி எம்.நிர்மல்குமார் முன்பு இந்த மனு விசாரணைக்கு வந்தது. மனுதாரர் தரப்பில் சென்னை உயர் நீதிமன்ற வழக்கறிஞர்கள் சங்க (எம்எச்ஏஏ) தலைவர் பால்கனகராஜ் ஆஜராகி வாதிட்டார்.
இதையடுத்து நீதிபதி, “சம்பந்தப்பட்ட வழக்கறிஞரின் நடத்தைக்காக தமிழ்நாடு, புதுச்சேரி பார் கவுன்சில் ஒழுங்கு நடவடிக்கை எடுத்துள்ளது. நீதிமன்ற அவமதிப்பு வழக்கிலும் அவர் கைது செய்யப்பட்டுள்ளார். இந்த வழக்கின் இறுதி அறிக்கையில் உரிய ஆதாரங்கள் சமர்ப்பி்க்கப்படவில்லை” என்று கூறி, சந்தானகிருஷ்ணனுக்கு எதிரான அவமதிப்பு வழக்கை ரத்து செய்து உத்தரவிட்டுள்ளார்.
