‘முரசு’ புயல் காரணமாக சென்னை மெரினா கடற்கரையில் அலைகளின் சீற்றம் நேற்று அதிகமாக இருந்தது. | படம்: எஸ்.சத்தியசீலன் |
சென்னை: வங்கக்கடலில் உருவான முரசு புயல் காரணமாக சென்னை கடற்கரைப் பகுதிகளில் கடல் சீற்றம் அதிகரித்து ராட்சத அலைகள் எழும்புகிறது.
இதனால் மெரினா உள்ளிட்ட கடற்கரைப் பகுதிகளில் பொதுமக்கள் கடலில் இறங்க சென்னை காவல்துறை தடை விதித்துள்ளது.
வங்கக்கடலில் உருவான முரசு புயல் காரணமாக சென்னை உள்ளிட்ட வட தமிழக கடலோரப் பகுதிகளில் காற்று வேகமாக வீசி வருகிறது. இதன் காரணமாக கடல் கொந்தளிப்புடன் காணப்படுகிறது.
கடற்கரையில் வழக்கத்தைவிட அதிக உயரத்தில் ராட்சத அலைகள் எழும்பி கரையை நோக்கி வேகமாக வந்து மோதுகின்றன.
இதனால் மெரினா, பட்டினப்பாக்கம், பெசன்ட் நகர் உள்ளிட்ட கடற்கரைப் பகுதிகளில் பொதுமக்கள் கடலில் இறங்கி குளிக்கவோ, நீந்தவோ கூடாது என்று போலீஸார் எச்சரித்துள்ளனர்.
கடற்கரையில் அலைகள் வந்து மோதும் பகுதிகளுக்கு அருகில் நின்று வேடிக்கை பார்ப்பதையும் தவிர்க்க வேண்டும். பெற்றோர் தங்களது குழந்தைகளை கடல் அருகே சென்று விளையாட அனுமதிக்கக் கூடாது.
புகைப்படம், செல்பி எடுப்பதற்காக ஆபத்தான பகுதிகளுக்குச் செல்லக் கூடாது என்றும் தெரிவித்துள்ளனர். கடலோரப் பகுதிகளில் பாதுகாப்புப் பணியில் ஈடுபட்டுள்ள போலீஸார் மற்றும் உயிர்காப்புப் பணியாளர்கள் பொதுமக்களுக்கு தொடர்ந்து எச்சரிக்கை விடுத்து வருகின்றனர்.
காற்று வேகமாக வீசி வரும் சூழலில் தேவையற்ற கடற்கரைப் பயணங்களை பொதுமக்கள் தவிர்க்க வேண்டும் என்று சென்னை காவல் ஆணையர் அமல்ராஜ் அறிவுறுத்தி உள்ளார். அவசர காலங்களில் காவல்துறையின் உதவி தேவைப்பட்டால் 100 என்ற தொலைபேசி எண்ணை தொடர்பு கொள்ளலாம் என்றும் தெரிவித்துள்ளார்.
முரசு புயல் காரணமாக சென்னையில் 5 விமானங்களின் புறப்பாடு, 6 விமானங்களின் வருகை என, மொத்தம் 11 விமானங்களின் சேவைகள் ரத்து செய்யப்பட்டன.
