இளைஞர் விளையாட்டுத் திருவிழாவுக்கான முன்பதிவை துணை முதல்வர் உதயநிதி நேற்று தொடங்கி வைத்தார். உடன் துறை செயலர் சத்யபிரத சாஹு, விளையாட்டு மேம்பாட்டு ஆணைய உறுப்பினர் செயலர் மேகநாத ரெட்டி.
சென்னை: ‘இது நம்ம ஆட்டம் 2026’ என்ற இளைஞர் விளையாட்டுத் திருவிழாவுக்கான ஆன்லைன் முன்பதிவை துணை முதல்வர் உதயநிதி நேற்று தொடங்கி வைத்தார்.
இளைய தலைமுறையினரின் உடல் மற்றும் மன ஆரோக்கியத்தை மேம்படுத்தும் வகையில் தமிழ்நாடு விளையாட்டு மேம்பாட்டு ஆணையம் சார்பில், ‘இது நம்ம ஆட்டம் 2026’ என்ற பெயரில் முதலமைச்சர் இளைஞர் விளையாட்டுத் திருவிழா, தமிழகம் முழுவதும் நடைபெற உள்ளது.
அதன்படி ஊராட்சி ஒன்றியம், மாவட்டம் மற்றும் மாநில அளவில் இந்த விளையாட்டுத் திருவிழா ஜன.22 முதல் பிப்.8-ம் தேதி வரை நடத்தப்படுகிறது. இதற்கான இணையதள முன்பதிவை துணை முதல்வர் உதயநிதி ஸ்டாலின் சென்னையில் நேற்று தொடங்கி வைத்தார். இந்த போட்டிகளில் 16 முதல் 35 வயதுக்குட்பட்ட இளைஞர்கள் பங்கேற்கலாம்.
தடகளம் (100 மீட்டர், குண்டு எறிதல்), கபாடி, கைப்பந்து, கேரம், கயிறு இழுத்தல் மற்றும் ஸ்ட்ரீட் கிரிக்கெட், ஓவியம், கோலப்போட்டிகள் மற்றும் மாற்றுத் திறனாளிகளுக்கு 4 பிரிவுகளில் போட்டிகள் நடத்தப்படவுள்ளன. ஊராட்சி ஒன்றிய அளவில் முதலிடம் பிடிப்பவர்களுக்கு ரூ.3,000, மாவட்ட அளவில் ரூ.6,000 பரிசுத்தொகையாக அறிவிக்கப்பட்டுள்ளது. மாநில அளவிலான போட்டிகளில் வெற்றி பெறும் அணிகளுக்கு தலா ரூ.75,000 வரை பரிசு வழங்கப்படும்.
இதற்காக தமிழக அரசு மொத்தம் ரூ.20.48 கோடியை பரிசுத்தொகையாக ஒதுக்கியுள்ளது. இப்போட்டிகளில் கலந்து கொள்ள விரும்பும் இளைஞர்கள் www.cmyouthfestival.sdat.in என்ற இணையதளத்தில் ஜன.21-க்குள் விண்ணப்பிக்க வேண்டும். தனிநபராகவோ அல்லது கல்வி நிறுவனங்கள் மற்றும் ஊராட்சி அமைப்புகள் மூலமாகவோ முன்பதிவு செய்யலாம். கூடுதல் விவரங்களுக்கு 9514000777 என்ற எண்ணைதொடர்பு கொள்ளலாம்.