சென்னை: மருத்துவமனைகளில் சிகிச்சை கட்டணங்களை வெளிப்படையாக காட்சிப்படுத்த வேண்டும் என்று மத்திய சுகாதாரத் துறை தெரிவித்துள்ளது.
இதுதொடர்பாக மத்திய சுகாதாரத் துறை செயலர் புன்ய சலிலா ஸ்ரீவஸ்தவா, அனைத்து மாநில தலைமை செயலர்களுக்கு எழுதியுள்ள கடிதத்தில் கூறியிருப்பதாவது: மருத்துவமனைகளில் வெளிப்படைத் தன்மை கொண்டு வந்தால், நோயாளிகள் மற்றும் அவர்களது குடும்பத்தினர் சிகிச்சைக்கான செலவை முன்கூடியே திட்டமிடுவார்கள்.
கட்டணம் தொடர்பான தேவையற்ற குழப்பங்ளை தவிர்க்க முடியும். மருத்துவ சேவைகள் மீது பொது மக்களின் நம்பிக்கையை அதிகரிக்கும். அதனால், மருத்துவ நிறுவனங்கள் சட்டம் அமலில் உள்ள மாநிலங்களில், ஒவ்வொரு சேவைக்கான கட்டண விபரங்கள் ஆங்கிலம் மற்றும் அந்தந்த உள்ளூர் மொழியில் பொதுமக்கள் எளிதில் பார்க்கும் இடத்தில் காட்சிப்படுத்த வேண்டும்.
மாநில பட்டியலில் சுகாதாரம் இருப்பதால், இவை முறையாக பின்பற்றப்படுகிறதா என்பதை தலைமைச் செயலர்கள் தனிப்பட்ட முறையில் கண்காணித்து உறுதி செய்ய வேண்டும். அதேபோல், மருத்துவ சுற்றுலாவாக வரும் வெளிநாட்டு நோயாளிகளுக்கு வழங்கப்படும் சிகிச்சை கட்டணங்களையும் வெளிப்படையாக காட்சிப்படுத்த வேண்டும். இவ்வாறு அவர் தெரிவித்துள்ளார்.
