சென்னை: தேர்தலில் வாக்களிப்பதுடன் நின்றுவிடாமல் தமிழகத்தின் வளர்ச்சியிலும் மக்கள் தங்கள் பங்களிப்பை வழங்க வேண்டும் என தமிழக ஆளுநர் ராஜேந்திர விஸ்வநாத் அர்லேகர் கூறி உள்ளார்.
சென்னை கிண்டியில் உள்ள ஆளுநர் மாளிகையில் ‘தமிழ்நாடு தினம்’ நேற்று வெகு விமரிசையாக கொண்டாடப்பட்டது. இதில் தமிழக ஆளுநர் ராஜேந்திர விஸ்வநாத் அர்லேகர், இஸ்ரோ தலைவர் நாராயணன் ஆகியோர் குத்துவிளக்கு ஏற்றி நிகழ்ச்சியை தொடங்கி வைத்தனர்.
மெட்ராஸ் வளர்ச்சி ஆய்வுகள் நிறுவனத்தின் இயக்குநர் சுரேஷ் பாபு, இஸ்ரோ விஞ்ஞானி வீரமுத்துவேல் உள்ளிட்டோர் கலந்துகொண்டனர். சமூகவளர்ச்சி, கல்வி, மருத்துவம், அறிவியல், பொருளாதாரம் உள்ளிட்ட துறைகளில் அளப்பரிய பங்களிப்பைச் செய்த 6 பேருக்கு விருது வழங்கி கவுரவிக்கப்பட்டது.
இதில் தொழில்துறையில் சிறந்த சேவைக்கான விருதை ஆளுநரிடம் இருந்து ராம்கோ சிமென்ட்ஸ் நிறுவன தலைமை செயல் அதிகாரி ஏ.வி. தர்மகிருஷ்ணன் பெற்றுக்கொண்டார்.
நிகழ்ச்சியில் இஸ்ரோ தலைவர் நாராயணன் பேசுகையில் “தமிழ்நாடு உருவாகி 70-வது ஆண்டை கொண்டாடும் தருணத்தில் மாநிலத்தின் வளர்ச்சியை நாம் நினைவுகூர வேண்டும். 25 சதவீதமாக இருந்த கல்வியறிவு 85 சதவீதத்தை எட்டி கல்வித் துறையில் புரட்சி ஏற்பட்டுள்ளது.
அதேபோல், ஆட்டோமொபைல், தோல் பொருட்கள், மின்னணுவியல் உள்ளிட்ட பல்வேறு தொழில் துறைகளில் தமிழ்நாடு முன்னணி மாநிலமாகத் திகழ்கிறது.
அமெரிக்காவிடமிருந்து ராக்கெட்டைப் பெற்று விண்வெளிப் பயணத்தைத் தொடங்கிய இந்தியா, தற்போது 6 ஆயிரம் கிலோ எடை கொண்ட செயற்கைக்கோளை வணிக ரீதியாக விண்ணில் செலுத்தும் அளவுக்கு வளர்ச்சி அடைந்துள்ளது.
இந்தியாவும் தமிழ்நாடும் பல்வேறு துறைகளில் அடைந்துள்ள வளர்ச்சிக்குப் பல தலைமுறைகளின் உழைப்பும் பங்களிப்பும் காரணமாகும்” என்றார்.
தொடர்ந்து ஆளுநர் ராஜேந்திர விஸ்வநாத் அர்லேகர் பேசியதாவது: தமிழகத்தின் ஆளுநராக இருப்பதில் பெருமை கொள்கிறேன். இம்மாநிலத்தில் அனைத்துத் திறன்களும் வளங்களும் உள்ளன.
எனவே, மாநிலத்தின் வளர்ச்சியை முன்னெடுத்துச் செல்லும் ஆற்றல் மக்களிடமே உள்ளது. அரசியல் காரணங்களுக்காக இலவசப் பொருட்களையும் திட்டங்களையும் அறிவிப்பது ஒரு போக்காக மாறியுள்ளது.
மக்களுக்கு இலவசங்களை அறிவித்து வாக்குகளைப் பெறுவது மட்டுமே நோக்கமாக இருக்கக் கூடாது. வளர்ச்சியில் மக்களின் பங்களிப்பு என்பது தேர்தலில் வாக்களிப்பதுடன் முடிந்துவிடக் கூடாது.
நாட்டின் நிர்வாகத்திலும் வளர்ச்சிப் பணிகளிலும் மக்கள் நேரடியாகவும் முனைப்புடனும் பங்கேற்க வேண்டும். அரசின் செயல்பாடுகளில் சமூகத்தின் பங்களிப்பும், மக்கள் பங்கேற்பும் மிகவும் அவசியமாகும். இவ்வாறு அவர் கூறினார்.
