‘ஜெம்’ வீரமணி
சென்னை: ஜெம் வீரமணி மீதான பாலியல் வழக்கு விவகாரம் தொடர்பாக காங்கிரஸ் நிர்வாகி ரஞ்சன் குமாரிடம் 2-வது முறையாக சிறப்பு புலனாய்வுக் குழுவினர் விசாரணை நடத்தினர்.
சிறுமிகளை பாலியல் வன்கொடுமை செய்த வழக்கில் ஜெம் கிரானைட் அதிபர் வீரமணி கைது செய்யப்பட்டு சிறையில் உள்ளார். சிறுமிகள் பாலியல் வன்கொடுமை செய்யப்பட்டதாக 2025 அக்டோபர் 6-ம் தேதி புகார் அளிக்கப்பட்டதாகவும், மறுநாளே சென்னை பாலியல் தடுப்பு பிரிவு போலீஸார் வழக்குப் பதிவு செய்ததாகவும் காவல்துறை தரப்பில் தெரிவிக்கப்பட்டது. ஆனால், 2024-ம் ஆண்டே உரிய ஆதாரங்களுடன் காவல் துறையில் புகார் தெரிவித்தாக காங்கிரஸ் நிர்வாகி ரஞ்சன் குமார் தெரிவித்திருந்தார்.
இதையடுத்து, அவரை அழைத்து சிறப்பு புலனாய்வுக் குழு போலீஸார் விசாரணை நடத்தினர். வழக்கு தொடர்பாக அவருக்கு தெரிந்த தகவல்கள் மற்றும் அவரிடம் இருந்த ஆதாரங்கள் குறித்து அதிகாரிகள் பல்வேறு கேள்விகளை எழுப்பினர். அவர் அளித்த தகவல்களை பதிவு செய்து கொண்டனர்.
இந்நிலையில், நேற்று 2-வது முறையாக ரஞ்சன் குமாரிடம் விசாரணை நடத்தப்பட்டது. விசாரணை முடிந்து வெளியே வந்த ரஞ்சன் குமார் கூறும்போது, “கடந்த முறை விசாரணை நடத்திய அதிகாரிகள் வேறு, இன்று விசாரணை நடத்திய குழுவினர் வேறு. மீண்டும் அனைத்து கேள்விகளும் கேட்கப்பட்டன. எனக்கு தெரிந்த அனைத்து தகவல்களையும் விசாரணை குழுவிடம் தெளிவாக தெரிவித்துள்ளேன்’’ என்றார்.
