தேனி: சிறையில் நடக்கும் உண்மை நிலை தெரிய நீதித்துறை விசாரணைக்கு உத்தரவிட வேண்டும் என்று தப்பியோடிய கைதிகளின் தாயார் முதல்வருக்கு மனு அனுப்பி உள்ளார்.
தேனி மாவட்ட சிறையில் இருந்து தப்பி பிடிபட்ட மீனாட்சிசுந்தரம், திருப்பதி ஆகியோரது தாயார் ஆறுமுகத்தம்மாள், முதல்வருக்கு அனுப்பியுள்ள கோரிக்கை மனு விவரம்: சிறையில் உள்ள எனது மகன்களுக்கு வழங்கப்பட்ட உணவு மிகவும் மோசமாக உள்ளது. இதுகுறித்து புகார் தெரிவித்ததால் சிறை அலுவலர்கள் கொடூரமாக தாக்கி தனிமைச் சிறையில் அடைத்துள்ளனர்.
இதுவே, இவர்கள் தப்பி ஓட முதன்மைக் காரணம் ஆகும். கைதிகளைப் பார்க்க வரும் உறவினர்கள் தரும் பொருட்களை சிறை அலுவலர்கள் பறித்துக் கொள்கின்றனர். நேர்காணல் அனுமதிக்கு சட்டவிரோதமாக பணம் பெறுகின்றனர்.
தப்பி பிடிபட்ட நிலையில், எனது மகன்களை மீண்டும் சிறைக் காவலர்கள் கடுமையாக தாக்கியதில் உடல் முழுவதும் பலத்த காயம் ஏற்பட்டுள்ளது. இந்த விவகாரத்தில் முதல்வர் உடனடியாக தலையிட்டு நீதித்துறை விசாரணைக்கு உத்தரவிட வேண்டும். அப்போதுதான், சிறையில் நடைபெறும் உண்மைநிலை தெரியவரும். மேலும், சிறையில் படுகாயமடைந்துள்ள எனது மகன்களுக்கு உடனடியாக உரிய சிகிச்சை அளிக்க நடவடிக்கை எடுக்க வேண்டும். இவ்வாறு மனுவில் தெரிவிக்கப்பட்டுள்ளது.
