முத்துமலை முருகன் கோயிலில் சுவாமி தரிசனம் செய்த அதிமுக பொதுச் செயலாளர் பழனிசாமி.
சேலம்: ஏத்தாப்பூரில் 146 அடி உயர முத்துமலை முருகன் சிலை கோயிலில் அதிமுக பொதுச்செயலாளர் பழனிசாமி சுவாமி தரிசனம் செய்து, பக்தர்களுக்கு அன்னதானம் வழங்கினார்.
சேலம் மாவட்டம் ஏத்தாப்பூரில் உலகின் மிக உயரமான 146 அடி உயர பிரம்மாண்ட முருகன் சிலையுடன் முத்துமலை முருகன் கோயில் அமைந்துள்ளது. இக்கோயிலின் கிழக்கு நுழைவாயிலில் திருப்பணிகள் மேற்கொள்ளப்பட்டு, ராஜகோபுரம் நிர்மாணிக்கப்பட்டுள்ளது. கோயிலின் மகா கும்பாபிஷேக விழா வரும் 25-ம் தேதி நடைபெறவுள்ளது.
இதையொட்டி, கோயிலில் யாகசாலை பூஜைகள் நடைபெற்று வருகின்றன. இரண்டாம் கால யாக பூஜை நேற்று நடைபெற்றது. இதில் பங்கேற்பதற்காக அதிமுக பொதுச்செயலாளர் பழனிசாமி, முத்துமலை முருகன் கோயிலுக்கு வந்தார்.
பிரம்மாண்ட முருகன் சிலையின் உச்சிப் பகுதிக்கு சென்று, உயரமான வெற்றிவேலுக்கு பாலாபிஷேகம் செய்து வழிபட்டார். தொடர்ந்து, மூலவர் சந்நிதியில் சுவாமி தரிசனம் செய்த அவர், யாகசாலை பூஜை, ஜோதிர்லிங்க வழிபாடு ஆகியவற்றிலும் பங்கேற்று, உலக மக்கள் நலன் வேண்டிப் பிரார்த்தனை செய்தார். கோயிலுக்கு வந்திருந்த பக்தர்களுக்கு பழனிசாமி அன்னதானம் வழங்கினார்.
இந்நிகழ்வில், சேலம் புறநகர் மாவட்ட அதிமுக செயலாளர் இளங்கோவன், எம்எல்ஏ-க்கள் வெங்கடாசலம், ஜெயசங்கரன், நல்லதம்பி, சம்பத்குமார் (அரூர்) உள்ளிட்ட அதிமுக நிர்வாகிகள் பலர் கலந்துகொண்டனர்.
