சென்னை: அடையாறு, பெருங்குடி மண்டலங்களில் குடிநீர் குழாய் மாற்றியமைக்கும் பணி காரணமாக குடிநீர் விநியோகம் கடந்த செப்.20-ம் தேதி முதல் நிறுத்தப்பட்ட நிலையில், நேற்று குடிநீர் விநியோகம் சீரானது.
இது தொடர்பாக சென்னை குடிநீர் வாரியம் வெளியிட்ட செய்திக்குறிப்பு: சென்னை மாநகராட்சி சார்பில், சோழிங்கநல்லூர் மண்டலம், 199-வது வார்டு, டிஎன்எச்பி- பிரதான சாலையில் மழைநீர் வடிகால் அமைப்பதற்காக, அப்பகுதியில் ஏற்கெனவே உள்ள நாளொன்றுக்கு 150 மில்லியன் லிட்டர் திறன் கொண்ட கடல் நீரைக் குடிநீராக்கும் நிலையத்திலிருந்து குடிநீர் கொண்டு செல்லும் 1,400 மில்லி மீட்டர் விட்டமுடைய பிரதான குடிநீர் குழாயின் வழித்தடத்தை மாற்றியமைக்கும் பணிகள் கடந்த செப்.20 முதல் 29-ம் தேதி வரை மேற்கொள்ள திட்டமிடப்பட்டது.
இதனால் அடையாறு, பெருங்குடி மண்டலங்களுக்குட்பட்ட பகுதிகளுக்கு குடிநீர் விநியோகம் நிறுத்தப்பட்டது. மாற்று ஏற்பாடாக, செம்பரம்பாக்கம் 530 மில்லியன் லிட்டர் குடிநீர் சுத்திகரிப்பு நிலையம் மூலம் குடிநீர் வழங்கப்பட்டது.
இந்நிலையில் பிரதான குழாயை 53 மீட்டர் நீளத்துக்கு மாற்றி பொருத்தும் அனைத்து பணிகளும் போர்க்கால அடிப்படையில் முடிக்கப்பட்டு, திங்கட்கிழமை (செப்.28) காலை 10 மணி முதல் சீரான குடிநீர் விநியோகம் தொடங்கப்பட்டுள்ளது. இவ்வாறு செய்திக்குறிப்பில் கூறப்பட்டுள்ளது.
