

அண்ணாமலை
கோவை: உயர் நீதிமன்ற தீர்ப்பு அடிப்படையில் திருப்பரங்குன்றத்தில் தீபம் ஏற்ற வேண்டும் என்று வீ த லீடர்ஸ் அமைப்பின் தலைவர் அண்ணாமலை தெரிவித்துள்ளார்.
இது தொடர்பாக அவர் கோவையில் நேற்று செய்தியாளர்களிடம் கூறியதாவது: திருப்பரங்குன்றம் மலை தீப விவகாரத்தில், உயர் நீதிமன்றம் வழங்கிய தீர்ப்பை மாநில அரசு பின்பற்ற வேண்டியது கடமை. திருப்பரங்குன்றம் போன்ற முக்கிய விவகாரத்தில் முதல்வர் விஜய் கருத்து சொல்லாமல் இருக்கிறார். நீதிமன்றம் தீபம் ஏற்ற அனுமதி வழங்கிய பின்னரும், கடந்த கால திமுக அரசு அதனை ஏற்கவில்லை. அதையே தவெகவும் ஏற்பதை ஏற்றுக்கொள்ள முடியாது.
இதனால் இரண்டு மதங்களுக்கு இடையே தேவையற்ற பகைமையை உருவாக்கும் வகையில் மாநில அரசு செயல்படக் கூடாது. திருப்பரங்குன்றத்தில் உயர்நீதிமன்றத் தீர்ப்பின் படி, 20 அல்லது 50 நபர்களையோ அனுமதித்து தீபத்தை ஏற்றுங்கள். முஸ்லிம்களுக்கு இது தேவையில்லாத பிரச்சினையை செய்யப்போவதில்லை.
செஞ்சியில் 7 வயது சிறுமி காணாமல் போய் 35 நாட்களைக் கடந்தும், சிபிசிஐடி, காவல் கண்காணிப்பாளர், டிஐஜி உள்ளிட்ட உயர் அதிகாரிகள் விசாரணையில் ஈடுபட்டும் சிறுமியை இன்னும் கண்டுபிடிக்கவில்லை. இது கவலை அளிக்கிறது.
குழந்தைகள் தினத்தை முன்னிட்டு குழந்தைகளுடன் கொண்டாட்டங்களில் ஈடுபடும் அரசு, 35 நாட்களுக்கும் மேலாக காணாமல் போயுள்ள, சிறுமியை மீட்பதில் கூடுதல் கவனம் செலுத்த வேண்டும். போர்க்கால அடிப்படையில் கண்டுபிடிக்க வேண்டியது, மாநில அரசின் கடமை. காவல்துறையினர் விரைந்து சிறுமியைப் மீட்டு பெற்றோரிடம் ஒப்படைக்க வேண்டும்.
கள்ளக்குறிச்சி தவெக எம்எல்ஏ அருள்விக்னேஷ் மாவட்ட ஆட்சியருக்கு ஆபாச தகவல் அனுப்பிய புகார் தொடர்பாக முதலமைச்சர் விஜய் வாய் திறக்காமல் இருப்பது அதிர்ச்சியாக இருக்கிறது. சம்பந்தப்பட்ட அதிகாரி மத்திய அரசுக்கு கடிதம் எழுதியிருந்தால், அதனை தலைமை செயலர் தெளிவுபடுத்த வேண்டும். ஆனால் அனைவரும் மவுனம் காப்பது அதிர்ச்சியாக உள்ளது. மாவட்ட ஆட்சியருக்கு நடந்த விஷயம் உண்மையா, பொய்யா என்பதை சொல்ல வேண்டும். இவ்வாறு அவர் கூறினார்.