சென்னை: மதுராந்தகம், தாராபுரம் இடைத்தேர்தலில் வாக்குக்கு அதிக பணம் கொடுப்பது தவெகதான் என்று மார்க்சிஸ்ட் கம்யூனிஸ்ட் மாநிலச் செயலாளர் பெ.சண்முகம் குற்றம் சாட்டியுள்ளார்.
தலைமைத் தேர்தல் ஆணையர் ஞானேஷ்குமாரை பதவி நீக்கம் செய்யக் கோரி சென்னையில் மின்ட் பேருந்து நிலையம் அருகே மார்க்சிஸ்ட் மாநில செயலாளர் பெ.சண்முகம் தலைமையில் ஆர்ப்பாட்டம் நடைபெற்றது.
பின்னர் செய்தியாளர்களிடம் சண்முகம் கூறியதாவது: தலைமைத் தேர்தல் ஆணையர், மோசடியான வழியில் பாஜக ஆட்சி அமைக்க அவர்களுக்கு ஆதரவாக செயல்பட்டு மிகப்பெரிய நம்பிக்கை துரோக்கத்தை இழைத்துள்ளார். தலைமைத் தேர்தல் ஆணையர் ஞானேஷ்குமாரை பதவியில் இருந்து உடனடியாக நீக்க வேண்டும்.
தவெக கூட்டணியில் பாமக இடம்பெற உள்ளதாக கூறப்படுவது வதந்தி என்றே நாங்களும் நம்புகிறோம். தவெகவை பொறுத்தவரை எந்த பிரச்சினையிலும் வெளிப்படைத்தன்மையுடன் கருத்துகளை வெளிப்படுத்துவது இல்லை.
மதுராந்தகம் தொகுதியில் பிரச்சாரத்துக்கு சென்றபோது, சில கிராம மக்கள் மற்ற கட்சியினர் பணம் கொடுப்பதாக தெரிவித்தனர். தவெகதான் அதிக அளவில் பணம் கொடுத்ததாக கூறுகின்றனர். இது பொதுமக்கள் கொடுத்த வாக்குமூலம். தூய சக்தி, வாக்குக்கு காசு கொடுக்க மாட்டோம் என்றெல்லாம் பிரச்சாரம் செய்யும் முதல்வர் இதற்கு பதிலளிக்க வேண்டும். இவ்வாறு அவர் தெரிவித்தார்.
எம்ஜிஆர் நகர் மார்க்கெட் அருகே நடந்த ஆர்ப்பாட்டத்தில் இந்திய கம்யூனிஸ்ட் மாநில செயலாளர் மு.வீரபாண்டியன் பங்கேற்றார். அப்போது அவர், “தலைமைத் தேர்தல் ஆணையர் பதவி விலக வேண்டும். அதுவரை இடதுசாரிகளின் போராட்டம் தொடரும்.
கடந்த சில நாட்களாக இடைத்தேர்தலையொட்டி தவெக, திமுக, அதிமுக ஆகிய மூன்று கட்சிகளை சேர்ந்த வசதி படைத்தவர்கள் தாராபுரம், மதுராந்தகம் தொகுதிகளில் முகாமிட்டுள்ளனர். இவர்கள் ஒவ்வொரு வீட்டிலும் எவ்வளவு வாக்கு இருக்கிறது, எவ்வளவு பணம் தரலாம் என கணக்கெடுக்கின்றனர். வாக்குக்கு விலை பேசுவது் குற்றம். இந்த குற்றச்செயலில் ஈடுபட்டவர்களை வரலாறு குற்றவாளி கூண்டில் நிறுத்தும்” என்றார்.
