படம்: எல்.சீனிவாசன்
சென்னை மாவட்ட வரைவு வாக்காளர் பட்டியல் வெளியிடப்பட்டுள்ளது. அதன்படி, சென்னையில் 25.79 லட்சம் வாக்காளர்கள் உள்ளனர். 14.25 லட்சம் வாக்காளர்களின் பெயர்கள் நீக்கப்பட்டுள்ளன.
சென்னை மாவட்டத்துக்கு உட்பட்ட 16 சட்டப்பேரவை தொகுதிகளுக்கான வரைவு வாக்காளர் பட்டியலை, அங்கீகரிக்கப்பட்ட அரசியல் கட்சிகள் முன்னிலையில், ரிப்பன் மாளிகையில் மாவட்ட தேர்தல் அதிகாரி ஜெ.குமரகுருபரன் இன்று வெளியிட்டார். பின்னர் செய்தியாளர்களிடம் அவர் கூறியதாவது:
வாக்காளர் பட்டியல் சிறப்பு தீவிர திருத்தப் பணியில், கணக்கெடுப்பு பணி நிறைவுற்று வரைவு வாக்காளர் பட்டியல் வெளியிடப்பட்டுள்ளது. இப்பட்டியல் அனைத்து வாக்குச்சாவடி மையங்களிலும், சிறப்பு முகாம்களிலும் பொதுமக்கள் பார்வைக்காக வைக்கப்படும். தேர்தல் ஆணைய இணையதளத்திலும் வெளியிடப்படும்.
வரைவு வாக்காளர் பட்டியலில் இடம் பெறாதவர்கள், வரும் ஜன.1-ம் தேதியன்று 18 வயது பூர்த்தி அடைந்த இளம் வாக்காளர்கள் படிவம் 6-ஐ பூர்த்தி செய்து தங்களது பெயர்களை சேர்க்கலாம். நிரந்தர இடமாற்ற பதிவுகள், இறந்தோர் மற்றும் ஆட்சேபனை, பெயர் நீக்கம் தொடர்பாக படிவம் 7-ஐ பூர்த்தி செய்ய வேண்டும்.
சட்டப்பேரவை தொகுதிகளிலேயே ஒரு இடத்திலிருந்து மற்றொரு இடத்துக்கு குடிபெயர்ந்து புதிய வசிப்பிடத்தில் உள்ளவர்களும், வேறு தொகுதிக்கு குடிபெயர்ந்தவர்களும் தங்கள் பெயரை அந்த பகுதியிலும், தொகுதியிலும் சேர்க்க படிவம் 8-ஐ பூர்த்தி செய்து, உரிய ஆவண நகல்களை இணைத்து சம்பந்தப்பட்ட தொகுதிக்குட்பட்ட மாநகராட்சி மண்டல அலுவலகத்தில் உள்ள வாக்காளர் பதிவு அலுவலரிடம் சமர்ப்பிக்கலாம்.
மேலும் இதற்காக வாக்குச்சாவடி மையங்களில் சிறப்பு முகாம்கள் நடைபெறும்போது அதனை பிஎல்ஓக்களிடமும் சமர்ப்பிக்கலாம். மேலும் https://voters.eci.gov.in என்ற இணையதளம் மூலமாகவும், தங்களுடைய பெயர் சேர்த்தல், நீக்கம் மற்றும் திருத்தங்கள் மேற்கொள்ளலாம். சென்னை மாவட்டத்தில் 3,718 வாக்குச்சாவடிகள் இருந்த நிலையில் தற்போது புதிதாக 361 வாக்குச்சாவடிகள் உருவாக்கப்பட்டு, மொத்தம் 4,079 வாக்குச்சாவடிகள் அமைக்கப்பட்டுள்ளன.
அதன் அடிப்படையில் இன்று வரைவு வாக்காளர் பட்டியல் வெளியிடப்படுகிறது. அதிகபட்சமாக வேளச்சேரி தொகுதியில் 314 வாக்குச்சாவடிகளும், குறைந்தபட்சமாக துறைமுகம் தொகுதியில் 192 வாக்குச்சாவடிகளும் அமைக்கப்பட்டுள்ளன. சென்னை மாவட்டத்தில் கடந்த அக்.27-ம் தேதி நிலவரப்படி 40 லட்சத்து 4,694 வாக்காளர்களின் பெயர்கள் இடம்பெற்றிருந்தன.
தற்போது சென்னை மாவட்டத்தில் 12 லட்சத்து 47,690 ஆண் வாக்காளர்கள், 13 லட்சத்து 31,243 பெண் வாக்காளர்கள் மற்றும் 743 இதர வாக்காளர்கள் என மொத்தம் 25 லட்சத்து 79,676 வாக்காளர்களின் பெயர்கள் வரைவு பட்டியலில் இடம் பெற்றுள்ளன. குறைந்தபட்சமாக துறைமுகம் தொகுதியில் 1 லட்சத்து 10,517 வாக்காளர்களும், அதிகபட்சமாக பெரம்பூர் தொகுதியில் 2 லட்சத்து 00,181 வாக்காளர்களும் உள்ளனர்.
மேலும் 1 லட்சத்து 56,555 இறந்த வாக்காளர்கள், 12 லட்சத்து 22,164 இடம்பெயர்ந்தோர், 27,328 கண்டுபிடிக்க முடியாதோர், 199 இதர வாக்காளர்கள் மற்றும் 18,772 இரட்டை பதிவு வாக்காளர்கள் என மொத்தம் 14 லட்சத்து 25,018 வாக்காளர்களின் பெயர்கள் நீக்கப்பட்டுள்ளன. குறைந்தபட்சமாக ராயபுரம் தொகுதியில் 51,711 வாக்காளர்களும், அதிகபட்சமாக வேளச்சேரி தொகுதியில் 1 லட்சத்து 27,521 வாக்காளர்களும் நீக்கப்பட்டுள்ளனர் என்று அவர் கூறினார்.
