சென்னை: பள்ளிக்கரணை சதுப்பு நிலத்தை அழிக்க ரூ.50 ஆயிரம் கோடியில் சதித் திட்டம் தீட்டப்படுவதாகவும், முதல்வர் விஜய் தனிக்கவனம் செலுத்தி அதை தடுத்து நிறுத்த வேண்டும் எனவும் பாமக தலைவர் அன்புமணி கேட்டுக்கொண்டு உள்ளார்.
இதுதொடர்பாக பனையூரில் உள்ள பாமக அலுவலகத்தில் அவர் செய்தியாளர்களிடம் கூறியதாவது: பள்ளிக்கரணை சதுப்பு நிலத்தை ஆக்கிரமித்து அழிக்க பல்வேறு நிறுவனங்கள் திட்டமிட்டு முயற்சி செய்து வருகின்றன. அதற்கு அதிகாரிகள் துணை நிற்கின்றனர்.
உயர் நீதிமன்றத்துக்கு தவறான தகவல்களை வழங்கி நீதிமன்றத்தையே தவறாக வழிநடத்தும் வகையில் சூழ்ச்சிகள் நடைபெறுகின்றன. இந்த விவகாரத்தில் முதல்வர் விஜய் நேரடியாக தலையிடவில்லை என்றால், ரூ.50 ஆயிரம் கோடி ஊழல் என்ற மிகப்பெரிய குற்றச்சாட்டு அவர் மீது வரும்.
சதுப்புநிலம் எது என்பதை முறையாக வரையறுக்க வேண்டும் என்பதுதான் எங்களது கோரிக்கை. இதை வரையறுப்பது தொடர்பாக 200 வகையான வரைபடங்களை முக்கிய அதிகாரி ஒருவரிடம் கொடுத்தும், தனியார் கட்டுமான நிறுவனங்களின் நிலங்களை காப்பதற்காக அவற்றை அந்த அதிகாரி நிராகரித்துள்ளார். இது மிகப்பெரிய மோசடியாகும்.
பரந்தூர் போன்ற மிகப்பெரிய திட்டத்தை நிறுத்திய முதல்வர், பள்ளிக்கரணை சதுப்புநிலம் அழிந்தால் சென்னை பாதிக்கப்படும் என்பதை ஏன் யோசிக்கவில்லை? பள்ளிக்கரணை சதுப்பு நிலத்தை சுற்றியுள்ள ஒரு லட்சம் பேருக்கு பட்டா கிடைக்காது என தனியார் கட்டுமான நிறுவனங்கள் கூறுவதும் உண்மை கிடையாது. முதல்வர் விஜய் இதில் தனிப்பட்ட கவனம் செலுத்த வேண்டும்.
ஊழல், சூழ்ச்சிகளை தடுத்து நிறுத்த வேண்டும். அதேபோல் கடந்த ஆட்சியில் உலக வங்கியில் ரூ.21.6 கோடி கடன் வாங்கி பள்ளிக்கரணை சதுப்பு நிலத்தில் 10 அடி உயரம், 15 அடி அகலத்தில் சாலையும், நடைபாதையும் அமைத்துள்ளனர்.
பொதுமக்களுக்கு அனுமதி கிடையாது என்ற நிலையில், அங்கு நடைபாதை எதற்கு? இதன்மூலம் வெள்ள வடிநீரை தடுத்துவிட்டால், அந்தப் பகுதியில் தனியார் கட்டுமான நிறுவனங்கள் கட்டிடங்களை கட்டிக்கொள்ளலாம்.
இதற்காக நடத்தப்பட்ட திட்டமிட்ட சூழ்ச்சி இது. இந்த திட்டத்தை அனுமதித்த அதிகாரிகளை உடனடியாக தகுதிநீக்கம் செய்ய வேண்டும். நடவடிக்கை எடுக்காவிட்டால் பலவகையான போராட்டங்களை பாமக முன்னெடுக்கும். இவ்வாறு அவர் கூறினார்.
