விதிமீறல்களில் ஈடுபட்ட 8 கல்குவாரிகள் மீது நடவடிக்கை: கோவை மாவட்ட ஆட்சியர் தகவல்

கோவை: கோவை மாவட்டத்தில் விதிகளை மீறிய 8 கல்குவாரிகள் கண்டறியப்பட்டு, அவற்றின் மீதான நடவடிக்கைக்கு பரிந்துரைக்கப்பட்டுள்ளதாக மாவட்ட ஆட்சியர் கிராந்திகுமார் பாடி தெரிவித்துள்ளார்.

இதுதொடர்பாக, அவர் வெளியிட்ட செய்திக்குறிப்பில் கூறியிருப்பதாவது: கோவையிலிருந்து கேரளா மாநிலத்துக்கு அனுமதியின்றி கனிம வளங்கள் கொண்டு செல்லப்படுவதாக புகார் மனுக்கள் வரப்பெற்றன. இதையடுத்து, மாநில எல்லைகளில், கனிம வளங்களை ஏற்றிச் செல்லும் வாகனங்களை ஆய்வு செய்ய பல்வேறு சிறப்புக் குழுக்கள் அமைக்கப்பட்டு கண்காணிக்கப்பட்டு வருகிறது.

சோதனைச் சாவடிகளில் 2022-23-ம் நிதியாண்டில், சார் ஆட்சியர் மற்றும் வருவாய் கோட்டாட்சியரால் 33 வாகனங்கள், காவல்துறையினரால் 5 வாகனங்கள், பறக்கும்படையினர் மூலம் 1 வாகனம், கனிம வளத்துறையினர் மூலம் 32 வாகனங்கள் என மொத்தம் 98 வாகனங்கள் ஆய்வு செய்யப்பட்டு, அதிக பாரம் ஏற்றிச் சென்றதற்காக அபராதம் விதிக்கப்பட்டுள்ளது.

கடந்த பிப்ரவரி 24-ம் தேதி முதல் மார்ச் மாதம் வரை 1,254 வாகனங்கள் ஆய்வு செய்யப்பட்டன. இதில், அனுமதியின்றி கனிம வளங்களை கொண்டு சென்றதற்காக சிறப்பு பறக்கும்படையின் மூலம் 15 வாகனங்கள், கனிம வளத்துறையினர் மூலம் 3 வாகனங்கள் கைப்பற்றப்பட்டன. அதிக பாரம் ஏற்றிச் சென்றதற்காக வட்டார போக்குவரத்து அலுவலர்களால் 21 வாகனங்களுக்கு அபராதம் விதிக்கப்பட்டது.

மாவட்டத்தில் முறையான அனுமதியின்றி செயல்படும் குவாரிகளை கண்டறிய ஆய்வு செய்யப்பட்டு வருகிறது. இதுவரை 12-க்கும் மேற்பட்ட குவாரிகள் முழு சர்வே செய்யப்பட்டதில் 8 குவாரிகளில் விதிமீறல்கள் கண்டறியப்பட்டு, உரிய அபராத நடவடிக்கைக்காக பரிந்துரை செய்யப்பட்டுள்ளது. மீதமுள்ள குவாரிகளில் சர்வே செய்ய நடவடிக்கை மேற்கொள்ளப்பட்டு வருகிறது.இவ்வாறு அதில் தெரிவித்துள்ளார்.