இறந்துபோன மகளின் ஜீவனாம்ச பாக்கித் தொகையை அவரது தாயார் பெற உரிமை உள்ளது: உயர் நீதிமன்றம்

சென்னை: இறந்துபோன மகளுக்கான ஜீவனாம்ச பாக்கித் தொகையைப் பெற அவரது தாயாருக்கு உரிமையுள்ளது என சென்னை உயர் நீதிமன்றம் உத்தரவிட்டுள்ளது.

மதுராந்தகம் பகுதியைசே சேர்ந்த அண்ணாதுரை - சரஸ்வதி ஆகியோர் கடந்த 1991ல் திருமணம் செய்து வாழ்ந்து வந்த நிலையில், கருத்து வேறுபாடு காரணமாக பிரிந்தனர். இவர்களுக்கு செய்யூர் நீதிமன்றம் 2005-ம் ஆண்டு விவாகரத்து வழங்கியது.

ஜீவனாம்சம் கேட்டு சரஸ்வதி 2014-ம் ஆண்டு தாக்கல் செய்த வழக்கை விசாரித்த மதுராந்தகம் நீதிமன்றம், மாதம் 7 ஆயிரத்து 500 ரூபாயை 2014-ம் ஆண்டு முதல் வழங்க வேண்டும் என 2021-ல் உத்தரவு பிறப்பித்தது.இந்த உத்தரவின்படி ஜீவனாம்ச பாக்கித் தொகை 6 லட்சத்து 22 ஆயிரத்து 500 ரூபாயைக் கேட்டு, சரஸ்வதி தாக்கல் செய்த மனு நிலுவையில் இருந்த போது, 2021-ம் ஆண்டு ஜூன் மாதம் சரஸ்வதி மரணமடைந்தார்.

இதனால், ஜீவனாம்ச பாக்கித் தொகையை வழங்க கோரி மகள் சரஸ்வதி தொடர்ந்த வழக்கில் தன்னை இணைக்கக் கோரி அவரது தாயார் ஜெயா மனு தாக்கல் செய்தார். அவரது மனுவை ஏற்று, வழக்கில் அவரையும் சேர்த்து மதுராந்தகம் நீதிமன்றம் உத்தரவிட்டது. இந்த உத்தரவை எதிர்த்து அண்ணாதுரை சென்னை உயர் நீதிமன்றத்தில் வழக்கு தொடர்ந்தார்.

இந்த வழக்கை விசாரித்த நீதிபதி வி.சிவஞானம், இந்து வாரிசுரிமை சட்டம் 15வது பிரிவின்படி, மனைவி இறந்துவிட்டால் அவருடைய சொத்துகள் குழந்தைகளுக்கும், அதன்பிறகு கணவருக்கும், அதற்கு பிறகே பெற்றோருக்கும் வரும் என கூறப்பட்டுள்ளது.

இந்த வழக்கை பொறுத்தவரை தம்பதிக்கு விவாகரத்து கிடைத்துவிட்டதால், பாக்கித் தொகையை பெற சரஸ்வதியின் தாயாருக்கு உரிமை உள்ளது எனக் கூறி, வழக்கில் ஜெயாவை இணைத்து மதுராந்தம் நீதிமன்றம் பிறப்பித்த உத்தரவை உறுதி செய்து, அண்ணாதுரை தாக்கல் செய்த மனுவை தள்ளுபடி செய்து உத்தரவிட்டுள்ளார்.