தந்தையுடன் கருத்து வேறுபாடு: 8-வது மாடியிலிருந்து குதித்து 12-ம் வகுப்பு மாணவி தற்கொலை

12-ம் வகுப்பு மாணவி 8-வது மாடியிலிருந்து குதித்து தற்கொலை செய்து கொண்டுள்ளார்.

கே.கே.நகர் ஆற்காடு சாலையில் 10 மாடி கொண்ட அடுக்குமாடி குடியிருப்பு உள்ளது. 8-வது தளத்தில் அருண் மூர்த்தி என்பவர் குடும்பத்துடன் வசித்து வருகிறார்.

இவரது மகள் பிரீத்தி (17). சென்னையில் உள்ள தனியார் பள்ளி ஒன்றில் 12-ம் வகுப்பு படித்து வந்துள்ளார். நேற்று முன்தினம் இரவு தந்தைக்கும், மகளுக்கும் இடையே தகராறு ஏற்பட்டுள்ளது. இதனால், விரக்தி அடைந்த பிரீத்தி 8-வது தளத்தில் இருந்து குதித்து தற்கொலை செய்து கொண்டுள்ளார்.

மாணவி தற்கொலை குறித்து கே.கே.நகர் போலீஸார் கூறியது: பிரீத்தி சரியாக படிக்கவில்லை என அவரது தந்தை கண்டித்துள்ளார். இதனால், ஏற்பட்ட கருத்து மோதலிலேயே மாணவி தற்கொலை செய்து கொண்டுள்ளதாக தெரியவந்துள்ளது. தொடர்ந்து விசாரித்து வருகிறோம் என்றனர்.