சிப்காட் அமைக்க எதிர்ப்பு: மெழுகுவர்த்தி ஏந்தி ஓசூர் விவசாயிகள் ஆர்ப்பாட்டம்

ஓசூர்: சிப்காட் அமைக்க எதிர்ப்பு தெரிவித்து, ஓசூர் உத்தனப்பள்ளியில் விவசாயிகள் மெழுகுவர்த்தி ஏந்தி ஆர்ப்பாட்டத்தில் ஈடுபட்டனர்.

ஓசூர் அருகே உத்தனப்பள்ளி, நாகமங்கலம், அயர்னப்பள்ளி ஆகிய ஊராட்சிகளில் 3,034 ஏக்கர் நிலப்பரப்பில் 5-வது சிப்காட் அமைக்க விளை நிலங்களைக் கையகப்படுத்தும் பணி நடைபெற உள்ளது. இதற்கு எதிர்ப்பு தெரிவித்து, சிறு, குறு விவசாயிகள் பல்வேறு போராட்டங்களில் தொடர்ந்து ஈடுபட்டு வருகின்றனர்.

இந்நிலையில், நேற்று முன்தினம் உத்தனப்பள்ளி வருவாய் ஆய்வாளர் அலுவலகம் முன்பு 100-வது நாளாக விவசாயிகள் காத்திருப்புப் போராட்டத்தில் ஈடுபட்டனர். இரவு விவசாயிகளுக்கு ஆதரவு தெரிவித்து கிருஷ்ணகிரி காங்கிரஸ் எம்பி செல்லகுமார் தலைமையில் விவசாயிகள் கையில் மெழுகுவர்த்தி ஏந்தி ஆர்ப்பாட்டத்தில் ஈடுபட்டனர்.