சம்பா சாகுபடி பாதிப்பால் அதிர்ச்சி?- 3 விவசாயிகள் உயிரிழப்பு

திருவாரூர், நாகப்பட்டினம் மாவட்டங்களில் 3 விவசாயிகள் அடுத்தடுத்து உயிரிழந்தனர். சம்பா பயிர்கள் பாதிக்கப்பட்ட அதிர்ச்சியில் அவர்கள் உயிரிழந்ததாகக் கூறப்படுகிறது.

திருவாரூர் மாவட்டம் கொராடாச்சேரியை அடுத்த முசிறியத்தைச் சேர்ந்தவர் சேகர்(52) இவர் தனக்குச் சொந்தமான 2 ஏக்கர் நிலத்திலும், குத்தகைக்கு எடுத்த ஒரு ஏக்கர் நிலத்திலும் சம்பா சாகுபடி செய்திருந்தார். ஆனால், போதிய தண்ணீர் இல்லாததால், சம்பா பயிர்கள் கருகிவிட்டதாகக் கூறப்படுகிறது.

இதனால் மனமுடைந்த சேகர் கடந்த 24-ம் தேதி விஷம் அருந்தியுள்ளார். திருவாரூர் மருத்துவக் கல்லூரி மருத்துவ மனையில் அனுமதிக்கப்பட்ட அவர் சிகிச்சை பலனின்றி நேற்று உயிரிழந் தார். இவருக்கு மனைவி, 2 மகன்கள் உள்ளனர். விவசாயி தற்கொலை தொடர்பாக கொரடாச்சேரி போலீஸார் வழக்கு பதிவு செய்து விசாரித்து வருகின்றனர்.

திருவாரூர் மாவட்டம் திருக் களாரைச் சேர்ந்தவர் நடராஜன்(75). இவர் 5 ஏக்கரில் நேரடி விதைப்பு செய்திருந்தார். தண்ணீர் இன்றி பயிர் கருகியதால் நேற்று முன் தினம் அதிர்ச்சியில் மரண மடைந்ததாகக் கூறப்படுகிறது. இவருக்கு மனைவி, 2 மகன்கள், ஒரு மகள் உள்ளனர்.

பயிர்கள் கருகியதால்..

நாகப்பட்டினம் மாவட்டம் கீழையூர் மாரியம்மன் கோயில் தெருவைச் சேர்ந்தவர் மாரிமுத்து(67). இவருக்கு 6 ஏக்கர் நிலம் உள்ளது. இதில் நேரடி நெல் விதைப்பு செய்திருந்தார். தண்ணீர் இல்லாமல் பயிர்கள் கருகிவிட்டன.

இந்நிலையில், இவரது பக்கத்து வயல்காரரும், நண்பருமான ராஜகுமாரன் என்பவர் கடந்த 28-ம் தேதி பயிர்கள் காய்ந்த வேதனையில் மாரடைப்பால் உயிரிழந்தார். அவரது இறுதிச்சடங்கில் பங்கேற்றுவிட்டு, நேற்று முன்தினம் மாலையில் வீடு திரும்பிய மாரிமுத்து, பயிர்கள் கருகியது குறித்து புலம்பிக்கொண்டு இருந்துள்ளார். திடீரென மாரடைப்பு ஏற்பட்டு இறந்துவிட்டார்.